L’APT con Lorenz “ferma” la Fiorentina

Data

12 de jugn 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Dut confermà per l ritiro de la squadra viola a Moena
I campionac de Enduro World Series 2019 de roda da mont ai 29 e 30 de jugn a Cianacei e l ritiro de la Fiorentina a Moena, en program dai 6 ai 21 de messèl, sarà i prumes evenc emportant che se tolarà dant l nef Comitat esecutif de l’Apt de Fascia.

La litazions é states en jebia ai 30 de mé e l Consei dut a una ge à renovà la stima al president Fausto Lorenz. Apede el l’é stat lità Elisa Maccagni desche vize presidenta, Tullio Pitscheider per i impianc portamont, Filippo Debertol e Patrizio Prandi per i hotelieres, Iris Brunel per i ficartieres e Marco Zanon per i Comuns e l’Aministrazions publiches. 

Chesta la squadra che lurarà per i trei egn che vegn ensema al diretor Andrea Weiss per meter jù la sceltes strategiches de l’Apt de Fascia. L president Lorenz à dit de esser content de sia nomina ma l se aessa spetà che vegne confermà duc i componenc del Comitat da inant e de aer amò desche vize president Davide Moser che l’à lurà n muie ben per i Mondièi Junior de schi. L’é stat preferì enveze l fat de tor ite componenc de duta la val per aer na maor raprejentatività. A la vize presidenza l’é stat metù Elisa Maccagni, l’é la pruma outa che vegn lità na femena per chesta encèria. 

Per chel che vèrda l ritiro de la Fiorentina someèa che l nef patron Rocco Commisso aesse declarà te na intervista che la squadra fosse restèda a Moena demò na setemèna per dapò jir ti Stac Unii. Enveze chisc dis dut é stat confermà ence percheche l’é n contrat che lea Fascia e la squadra viola che perveit che la reste te val amancol 14 dis. La val fèsc n gran investiment sun chest ritiro e n muie de ghesć, pascioné de la squadra, à jà prenotà sia feries a Moena.  (MCI)