Chino, teater, cultura: ciak se śira

Data

25 de jugn 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
A la descorida del “nef” chino de Cianacei de gra a na intervista a Francesco Pitscheider, nef gestor de la strutura
L “cinema” fona sie reijes te doi componenc obligatories, n scherm e la carieghes, e percheche l ciape vita ge vel esser bogn de empienir ite duc e doi. A empienir ite l scherm ge peissa atores e regisć, chi che dèsc forma a l’èrt e peissa a coluna neva formula, a coluna neva storia poder meter dant al mond per mever fora la ènemes de la persones. Per chel che vèrda la carieghes enveze, ge vel che duc laore ensema: che sie na strutura aldò, che la jent sie desponìbola a proèr l’emozion del chino e che sie valgugn che se tol l’empegn e se sproe per gestir la strutura. No semper chisc trei fatores se à scontrà a Cianacei e coscita l chino Marmolèda, anter auc e basc, no l’é mai stat tout dassen en conscidrazion da la popolazion. Ades aboncont, l chino de Cianacei l’é vertech a nascer endò da nef, sot la vida de Francesco Pitscheider. Ge aon domanà fora vèlch en cont de chest nef projet e el, dò ne aer sobito dit n develpai per chesta intervista, l ne à metù dant sia idees e si pensieres.

"Can vegnarèl avert l chino de Cianacei? - Pontèr via con la neva gestion de n chino met dant più che n ostacol a livel burocratich e ge vel se meter en orden ence dal pont de veduda fiscal. Mia speranza l’é de averjer i ujes ai prumes de messèl".

"Sarèl vèlch possibilità ence per l fora-sajon? - Son spervajo del fat che l chino de Cianacei l podessa, e l cognessa, doentèr n zenter de agregazion culturèla per duta la val. L fora-sajon donca no aessa rejon de esister, ajache la cultura no à auc e basc, se cogn ge jir dò dut l’an. L’é vera che l’é lonc tempes olache no l’é ghesćte Fascia e lóla programazion podessa esser limitèda ai week-end, aboncont reste de l’idea che na strutura desche chesta cognessa esser averta da jené a dezember. Cogne demò capir co otimisèr la gestion per arjonjer chest obietif".

Amò Francesco Pitscheider l disc: "Ve envìe enveze a vijitèr l sit del chino (www.cinemacanazei.it) per veder la neves e l calandèr de la proiezions apena che l sarà publicà. Per consees, critiches e proponetes enveze, se pel scriver a la mail info@cinemacanazei.it. Ve spete de n muie tel nef chino de Cianacei!".


Lejé l'intervista entria su la Usc nr 24 stampèda ai 21 de jugn  (Daniele Verra)