Alex Zanardi se arceda te Fascia

Data

11 de messel 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La steila de la nazionèla de paraziclism à troà alberch con si compagnes a Soraga.
L’é dò che l se alenea te Fascia chisc dis Alex Zanardi, l campion bologneis ex pilot de Formula Uno, la steila de la nazionèla de paraziclism. Se l veit corer sun stradon fora per duta Fascia con sia handbike: spales lèries, brac e mans granes e na gran gran forza de volontà, chela che ge serf per spenjer sia roda. L starà te Fascia fin ai 18 de messèl con si compagnes de la nazionèla per se arcedèr per tor pèrt ai empegnes agonistics de aost e setember.

L grop de na trentina de persones, anter atlec e staff tecnich, l’à troà alberch al Park Hotel Avisio de Soraga, na strutura adatèda ai besegnes de la Federazion de Paraziclism, troèda fora de gra a Trentino Holidays. Duc i dis da doman Zanardi e si coleghes i pedala su la strèdes de la val, dapò i fèsc fisioterapìa, i se troa per sia scontrèdes tecniches e i se tol ence vèlch moment de spas. Desche chel che i se à conzedù enstadì canche i é jic sun Bufaure. En mercol ai 10 de messèl i dirijenc de la sozietà portamont Bufaure ge à dat l bevegnù a Poza e i li à compagné fin sa mont per goder de la marevees del Ciadenac e del Saslonch. 

I atlec – à spiegà l comissar tecnich Mario Valentini – se arcedea tant sul portoi per la rodes che sun stradon, ti toc con manco auti e soraldut i preferesc jir sui jouves desche Fedaa o Mont de Vich. Per ic chest l’é n moment emportant per i arcedamenc ajache ai 20 de messèl i arà jà la proa de Copa Europa a Dueville, che serf per meter ensema ponc per la Olimpiades. Dai 4 de aost enveze i sarà tel Canada per la Copa del Mond e dai 21 ai 29 de setember i sarà ai Mondièi de ziclism te la Gran Bretagna.