L’Eucarestìa: l’autostrèda per l Ciel

Data

23 de messel 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La mostra »I Miracoi Eucaristics tel mond« é stata inaugurèda te Oratorie de Moena
L’é n percors fat de na lingia de tulins con de gregn placac chel che é stat enjignà te teater de l’Oratorie de Moena. Se trata de la mostra »I Miracoi Eucaristics tel mond« che travers retrac e descrizions storiches la met dant vèlch un di prinzipai Miracoi Eucaristics (presciapech 136) che l’é stat tel cors di secoi te desvalives Paìjes del mond e recognosciui da la Gejia. L’é na mostra internazionèla che é jà stata veduda te duc i Continenc e te gran pèrt de la parochies, ma ence ti Santuaries più cognosciui desche Fatima, Lourdes e Guadalupe. Paa la speisa se tor fora l temp e se fermèr a lejer la storia de chisc gregn miracoi che l’é stat tel mond travers l’Erucarestìa, ma paa la speisa ence saer da olache vegn chesta mostra e chi che l’à metuda ensema. La é stata projetèda e realisèda da Carlo Acutis, n joen che é mort de 15 egn per na forma de tumor al sanch ai 3 de mé del 1991 a Monza. La sia l’é stat na vita curta ma piena, na vita de vera testimonianza cristièna. Da canche l’à ciapà la Pruma Comunion de set egn l’é semper jit a messa ogni dì e l stajea tedant al Tabernacol per adorèr l Segnoredio. L’era n joen desche i etres con la voa de se goder coi amisc, de jièr a balon, de sonèr l sax, ma soraldut l’aea n gran talent per dut chel che é leà a l’informatica. I restèa duc maraveé da sia capazità de programazion de computer, de montaje de film, de creazion de siti web. L’é stat coscì che l’à metù ensema la mostra sui Miracoi Eucaristics. El dijea semper che noscia meta più auta cogn esser la Parola de Die e per ruèr a El ge vel mesi spezièi: i Sacramenc e la orazion. En particolèr Carlo metea al zenter de soa vita l Sacrament de l’Erucarestìa e l dijea che l’era »sia autostrèda per l Ciel«. L dijea ence che »canche se se met tedant al soreie se doventa neigres… ma canche se se met tedant a Gejù te l’Eucarestìa se doventa sènc.« »Duc nascion desche originèi, ma n muie mor desche fotocopies« l’aea scrit. N destin che no ge à partegnù ajache dò i 5 egn pervedui da la normes canoniches, la Diozesa de Milan à envià via l prozess per sia beatificazion. Ai 5 de messèl del 2018 Papa Francesch à autorisà la publicazion del decret che declara Carlo Venerabol. Endèna te la Tèlia e tel mond se smaora semper de più la stima per chest joen che à chierì la santità a na vida straordenèra, enceben te l’ordenarie de la vita de duc i dis.

De più su La Usc 28 di 19 de messèl  (Monica Cigolla)