Ciantie sot nosce crepe

Data

22 de messel 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Ence chest an l grop de volontadives »Festa e Vea« à endrezà la recordanza sa La Tasćia
Ence chest an l grop de volontadives »Festa e Vea« à endrezà la manifestazion »Ciantie sot nosce crepe« sa La Tasćia te Fuciada. Na scomenzadiva che vegn fata per recordèr che sun chela costes se à troà a combater de contra Alpins e Kaiserjäger e percheche no cogne più sozeder chisc fac aricegoi. Vejin al monument, entorn mesa les 11 da doman, se à binà i Gropes di Alpins da Soraga e da Falciade per l’auza bandiera, n moment rich de segnificac che tocia semper l cher de duc i prejenc. Don Andrea Malfatti à dit messa compagnà da la cianties del Cor Val Biois de Falciade.Dapò duc se à tramudà ta La Val olache i volontadives aea enjignà na bona marena. Per l’ocajion l’é stat endrezà l piat de l’Alpin con polenta e liènes e l piat del Kaiserjäger con gnoches e craut. Chest an per dèr fora da magnèr no l’é stat durà nia de plastica, dut biceres e boces de vierech e taeres de legn e chesta atenzion per l’ambient é stata dassen aprijièda. Chiò l’é stat metù fora la mostra de retrac dal titol »La Gran Vera a Fuciada« che testimoniea i combatimenc stac sun chesta mont endèna la pruma vera, touc fora da l’archivie del tenent Arturo Andreoletti e domesdì l’é stat l’esibizion del Cor Negritella da Pardac. Demò n particolèr à mìngol scurì l cher de chi che ogne an se dèsc jù per l’endrez de la recordanza. Luca Zulian ne à contà che na dì de mé el e so fra Umberto à portà fin sa La Tasćia na gran cornisc de 35 chili per ge la meter dintorn al retrat de Andreoletti che ence l’an passà era stat metù fora tedant al monument. Sun chest retrat l’é su n Alpin che sbèra sot l’Om pìcol. Emben chisc dis i à troà la fegura de l’Alpin duta sbriscèda e righèda. »L’é stat burt veder che l’é amò valgugn che fasc a truz per meter bega anter Alpins e Schützen, proprio aló che l’é semper stat pissà a duc doi i gropes con l monument olache l’é su tant l ciapel de Alpin che chel di Kaiserjäger. L retrat metù fora no volea esser na provocazion.« L grop »Festa e Vea« spera che no sozede più de chisc fac. Endèna i vel fèr a saer che ence chest an pèrt del vadagn de chesta festa e de la monteèda endrezèda de jugn jirà en benfizenza. Acà doi egn l’é stat didà fora la sociazion Bambi, l’an passà i à didà a fèr sù i cuerc de la cèses de La Rocia che era stac dessaté dal tormen Vaia e chest an i didarà fora Attilio Dantone che vel fèr sù n’autra scola tel Tibet.  (Monica Cigolla)