Dò 60 egn sun Ciampedìe, ades me gode l paìsc

Data

15 de agost 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La familia Pederiva à zedù la gestion del Refuge Ciampedìe. Massimo ne conta de si recorc e de le rejon de chesta scelta
Refuge Ciampedìe con chest istà l’à na neva gestion, i se l’à tout te man i frades Dorich da Poza che aló apede i à ence la Baita La Zondra. Se sera sù coscita na longia storia de gestion de un di refuges più veies del Ciadenac da man de la familia de Fritz da Vich. Dò 60 egn de vita passada anter i mures de chel veie refuge, Massimo Pederiva à zedù la gestion. Noi aon fat cater ciacole con el che l ne à contà valch un de si recorc.
 
Massimo, tu as fat 60 egn de vita sun Ciampedìe…
Ei, i prumes varesc i é fac proprio colassù. Gio son nasciù del ’59 e d’aisciuda del 1960 mi genitores Fritz e Elvira i à tout en gestion l Refuge Ciampedìe e i me à portà su. Mie pare fajea l pitor jun Busan e l vegnìa su demò la sabeda, la domenia e le feste e te refuge l’era mia mare, la se rangiaa dut ela ensema con soe sores. Ma enlaùta no l’era mia desché ades…
 
Donca tu es semper stat lassù, tant d’invern che d’istà…
Ei, no é mai vedù n istà te paìsc. Dai prumes de dezember fin a canche sera i impianc e dapò da de mé fin la fin de otober.
 
Co fajeeste con la scola canche tu ere pìcol?
D’invern no dormìane beleche mai te refuge. Jìe su a marena e dapò vegnìe en ju coi schi. Fin del ’63 l’era la sentadoa che partìa ló dal pech, dapò i à fat la forenadoa mingol più en su e del ’85-’86 i à fat sù la neva forenadoa.
 
Can aste tout tu te man l refuge?
L’é tout te man de l’88 e son semper stat te ciasadafech. Gio é fat la scola de perit eletrotecnich e fora de sajon é fat l’eletrizist. L cogo l’é emparà con mia mare ajache da 14 egn en su son semper stat te cojina con ela. Dapò é fat per na dejina de egn ence l maester de schi.
 
Ence toa familia éla semper vegnuda sun Ciampedìe?
Ei, mia femena Fiorella la é vegnuda su a far la sajon, se cognosciane ben da dant ma da enlaùta no la é più se n jita… Se aon maridà de l’82 e de l’83 l’é nasciù Denise, mia fia più grana, dò aon abù Walter e Alex. Denise la fasc la comerzialista e l’à so lurier, i autres doi i ne à semper didà d’istà, l più picol te ciasadafech e l’auter te bar, ma duc doi i é maestres de schi e donca apenamai che vegnìa mingol de bianch i sparìa, ge saea più bel far scola.

Podede troèr l'intervistas entrìa su La Usc 31 di 09 de aost  (Monica Cigolla)