La Grupa Helios à »ispirà« con gran suzess

Data

14 de agost 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
I joegn ciantarins e musizisć da Ortijei é stac ghesć de la rassegna de evenc de la parochies de Fascia
La Grupa Helios à tegnù sia pruma ejibizion te Fascia e l’é stat n suzess. En domenia ai 4 de aost l grop de ciantarins e musizisć da Ortijei é stac ghesć de la rassegna »Ispirazions d’istà 2019« a La Gran Ciasa a Soraga. L’event l’é stat endrezà da la Comiscion per la cultura de la parochies de Fascia en colaborazion con l Comitat manifestazions e l Comun de Soraga e l sostegn de l’Apt de Fascia.
N event straordenèr e ecezionèl che à fat cognoscer al publich fascian, dassen de n gran numer te sala, e a chel forest, l talent musical, la oujes e l’interpretazion de chest grop de 15 joegn.
La Grupa Helios l’à na storia de passa 40 egn. La é stata metuda sù del 1977 dal preve Siur Jakob Ploner e da enlouta l’à seghità ti egn a viventèr la messes, la festes per joegn e i maridoc. I Helios l’é stat i prumes tel Sudtirol a ciantèr cianties ritmiches modernes te gejia e dachelanvìa i ge à avert la strèda a n muie de etres gropes. Te chisc egn l grop à tout sù n stil personèl e i componenc à scrit n muie de cianties, per ladin, ingleis, todesch e talian. Del 2017, per festejèrt i 40 egn, l’é stat dat fora l nef CD dal titol »Suvier«.
En domenia sera su la paladina de La Gran Ciasa i à portà na cercia del CD con la cianties »La Crissa«, »Wake up«, »Ritmi« e »Tl nibl« ma i à ence engaissà l publich con n muie de cover che é states adatèdes per vegnir ciantèdes ence te gejia desche »Fall on me« de Andrea Bocelli, »Padre Nostro dove sei« de Oro e »Holy Mother« de Eric Clapton.
La oujes de la joenes ciantarines Anna, Carmen, Anna, Jana, Lisa, Irene, Sara, Vera, Lara e Maria se à enterzà te vèlch ciantia ensema a chela forta e gaerta del joen Alex che à soscedà lonc batimans. Apede a el, a la chitara Julian, al bas Martin, al piano Sofia e a la baterìa Samuel.

De più su La Usc 31 di 09 de aost  (Monica Cigolla)