N joen poliedrich engaissà dal mond

Data

17 de agost 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Musega, robotica e politica l'é la pascions de Gabriele Bernard da Cianacei.


Te la Tèlia l’é n’emergenza dassen grieva, chela di joegn che se n va a la foresta per lurèr e per troèr na situazion economica miora. Aboncont, chiò te val podon dassen dir de aer na joentù che fioresc vigni an de più, de gra ence ai projec che envìa via la Scola Ladina e autra desferenta sociazions da vigni paìsc de val. I joegn à gaissa de fèr e de se sproèr.
Sion jic a rejonèr con Gabriele Bernard, n joen da Cianacei che da egn l sona l pianofort al Conservatorie Monteverdi de Busan, l’à na gran pascion per la robotica e l’é empegnà politicamenter. L'aane intervistà su la Usc di 22 de mèrz de chest an per l Fridaystrike a Busan.

Chi éste pa?
Gé é inom Gabriele, é 18 egn e stae a Cianacei. Son dò che studie jun Busan, dalajà che chiò da desvalives egn jìe al Conservatorie Monteverdi de musega per emparèr a sonèr l pianofort.

Che scola fèste jun Busan?
Vae al liceo scientifich Rainerum che l met dant ence n percors de studies de robotica, olache é podù cognoscer chesta neva disciplina. Te chest istitut, defat, l'é n grop de robotica che da egn l porta inant projec da prejentèr a concorsc e fieres. Anter i ultimes l'é l'umanoide de inom H.A.I.D.I., che l'é bon de entener chi che rejona e responer tras n sintetisador de ousc. Anter sia particolaritèdes l'é la doura de na rei neurala computerisèda e la capazità de manèr fora emozions tras la foja de la soracees, che la pel mudèr de gra ai led metui tedò l mus stampà en 3D.

De segur ti ultimes egn t’ès fat l'alternanza scola-lurier...
Ei, chesta l'é stat n'autra ocajion che é abù per me maraveèr amò de più del mond de la robotica, tel spezifich tel ciamp de l'industria 4.0. Chesta esperienza la é fata te l'Università de Busan tel laboratorie “Smart Mini Factory”. Chiò i studenc i empèra a programèr brac robotics industriai e i colaborea con aziendes per ge enjignèr servijes tel ciamp de l'industria 4.0 e de l'automazion. L'é stat dassen na possibilità per emparèr ence a programèr robot profescionai.

De più su La Usc di Ladins 32 di 16 de aost  (Nicoletta Riz )