Alpaca e èrt: auta moda da la Andes

Data

16 de agost 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Se empegn e ciarità troa sun sia strèda pascion, estro artistich e profescionalità, i resultac é da marevea. I vegn prejenté en domenia sera te na defilèda te tendon de Poza e se pel i veder en mostra a Poza e Vich.

Alpaca e èrt se entrecia su la Andes: con chest titol la volontères de Operazione Mato Grosso é ruèdes ence chest istà da desvalives lesc de la Tèlia per portèr a Poza e a Vich sia bela esposizion de lurieres de maia, tessidura, sartorìa e recam. Chisc manufac l’é l frut del lurier fat da la fémenes de l’America Latina ti “taller” de Don Bosco, i laboratories e la copratives metudes sù dal salesian P. Ugo de Censi (mort tel Perù de dezember del 2018, de 94 egn) a la fin di egn ’70 per ge dèr l met a la jent che vif ti pìcoi paìjes su la Andes de lurèr e didèr a mantegnir e rencurèr sia families a na vida degnitousa. Te chisc “taller” i fenc produsc la mobilia che oramai se à fat cognoscer belebon te nosc raion, la touses enveze se dèsc jù con lurieres de maia, recam o tessidura, sot la vida de la volontères. 

Ogne tòch vegn fat dut a man, rencurà da na tousa o femena che se tol a cher duta la produzion, dal scomenz a la fin. Apede ai bie tapees coi dessegnes che recorda la tradizion incaica e ai fins recames, fèsc marevea soraldut i guanc: no demò la bela maies tradizionèles de lèna, con de bie colores ma magari mìngol “grovies”, ma ence guanc e fornimenc dassen refiné, morbies e lijieres, olache l’alpaca se mesceida ence con la seida. Guanc studié fora col didament de Luigi Dall’Amico, n stilist venet che à lurà ence per i maores inomes de la moda internazionèla e che deldut debant, descheche l’é l fondament de la sociazion, à metù a la leta sia profescionalità per creèr apontin modìe degnes de la miores “boutiques”. 

Dall’Amico va tel Perù presciapech vigni doi egn, alól vèrda la capazità, la manualità, l’estro artistich de la femenes e touses che laora e l dezide colun che l’é l lurier da poder ge dèr sù con mior ejit: fèr guanc a maia con la lèna de alpaca, fèr tapees, bolghes o recames. Ogneuna pel coscita svilupèr si talenc e realisèr prodoc de gran beleza. I dessegnes i se refèsc a chi de la cultura veiora del post, reinterpreté per poder ge jir encontra a ogne sort de gust, da chi che aprijia l stil più etnich a chi che enveze i chier vèlch da più refinà o enscinamai de lus. 

A vardèr chisc lurieres se resta dassen encanté, e no somea possìbol che i sie stac fac te pìcoi paìjes te mez a la Andes, a passa 3000 metres de auteza: enscin aló l’é stat portà duc i materièi che serf, acioche la femenes posse lurèr zenza cogner arbandonèr si fies, e da aló i prodoc fenii é stac porté enscin chiò da nos, semper travers l lurier debant di volontadives, a na vida che dut l recavà posse vegnir reinvestì per comprèr i materièi e per ge dèr n paament degnitous a chi che laora. 

Enscin ai 24 de aost chisc lurieres é da poder veder te doi esposizions, a Vich te Ciasa Marmolada e a Poza te Oratorie, avertes da les 9:30 a les 12:30 e da les 15:30 a les 19:30, e a Vich ence dò cena fin les 22:00.

Te chisc dis te la doi esposizions l’é n gran da fèr, ajache Luigi Dall’Amico l’é ruà e l’é dò a vardèr che dut vae ben per l’endrez del moment de maor emportanza. En domenia ai 18 de aost, defat, chisc guanc maraveousc sarà i protagonisćde la defilèda de auta moda te tendon de Poza: touses e fenc da chiò e da foravìa sarà per na sera modeles e modìe che cognarà defilèr a na vida profescionèla, e trei volontères de l’OMG ruèdes apontin chisc dis dal Perù les contarà sia esperienza de lurier e co che nasc chisc guanc beliscimes.

La defilèda di guanc andins de l’Operazione Mato Grosso era jà stata endrezèda n’outa con gran suzess chiò te Fascia, te l’istà del 2013, e l’aea lascià dut l publich encantà. Segur ence chest’outa sarà na ocajion da no se perder.  (Lucia Gross)