Bèsta cantieres d’istà

Data

18 de agost 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L conseier de procura del Comun general de Fascia Mario Deluca se lamenta di cantieres orii sa mont che dèsc d’empaz ai ghesć e l domana de i serèr
I meisc da d’istà l’é meisc bogn per l lurier a l’averta, ti cantieres canche l’é bon temp se laora delvers e a na vida spedienta. Ma l’é ence l revers de la medaa.
Sun chest à tout posizion enstadì l conseier de procura ai bosć, programazion sozio-economica e member del comitat tecnich forestal de la Provinzia de Trent per l Comun general de Fascia Mario Deluca con n comunicat.
»Sente l doer de scriver vèlch en merit a l’endrez di cantieres d’istà – scrif l conseier Mario Deluca. Ence gé é na atività sun Ciampac e mete gran empegn per fèr a na vida che i turisć passe sia vacanzes a na vida gustegola. Desche gé, sé che n muie de coleghes se dèsc jù percheche i ghesć se n vae da la val contenc di alberghes, restoranc, pizerìes, refuges da mont, boteighes e strutures rezetives e de la restorazion. Per chest me fèsc ira che, de aost, sie cantieres orii che fèsc biteboi sa mont, olache la jent chier pèsc e acort. Rejone soraldut de Ciampac olache, da n muie de egn, gestesce ensema a mia familia n refuge. Enceben che respete la sozietèdes de impianc portamont che da carant’egn investesc per miorèr la calità e l’oferta da d’istà e d’invern, cree che sie de besegn de ge dèr atenzion ai turisć. Chisc dis passé n muie se à lamentà per l biteboi di cantieres orii tant sa mont che su la strèda che da Dèlba rua sun Ciampac, che nos duron per portèr su la roba te refuge.
Ciampac l’é na valena verda e chieta olache se troa n muie de sorts salvères de besties, da la più pìcoles a la più granes, ma ence ciaures, ciavai, musciac e gialines che vegn portèdes sa mont d’istà dai refugisć per smaorèr l’atratività del post, soraldut per la families e i bec pìcoi. Chest lech l’é ence na oasi vegetèla con la prejenza de n vidor botanich e de troes tematics, desche chel de la montagnoles, e l’é zenter de scomenzadives e de laboratories, desche chel del smauz che vegn fat n’outa en setemèna. Dut chest fèsc de la mont de Ciampac n post ideèl per se goder la natura de la Dolomites e se relassèr, ma se canche se rua se troa cantieres e mesi gregn che va stroz da duta la ores del dì, l sforz fat enscin ades per l propor te la mior vida che l’é meso va dut a se perder.
Per chest me ouje a duta la aministrazions per ge domanèr che i lasce sù i lurieres d’istà. Saon che la mobilità de la val l’é nosc pont critich e speron da temp te soluzions asveltes e adatèdes, ma se se meton a piorèr la situazion ence con cantieres, l dan pel doventèr fatal. Cherion de tor ejempie dai lesc de mèr, olache da jugn a setember l’é l diviet de orir cantieres sora na certa dimenscion.
Fazile aost l’é n meis ezelent per i lurieres, ma sion te na val turistica, te la Dolomites Patrimonie Unesco e no dajon na oferta adatèda se aon gregn cantieres atives sa mont che ge sceca a nesc ghesć.
Chest apel va te la direzion de na maor colaborazion percacenta anter gestores de refuges e sozietà de impianc portamont, a na vida da miorèr la gestion de duta la zona. Me augure che, tel davegnir, sun Ciampac se posse ge sporjer ai turisć relax, chiet, natura e bona cojina, ben segur en sinergìa con la sozietèdes de impianc portamont.«