Dolomites te piaz

Data

11 de setember 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Per i 10 egn de Dolomites Unesco l’é stat metù fora te Piaz de Comun de Sèn Jan na bela esposizion de retrac de monts che tol ite duc i 9 sistemes che fèsc pèrt de la Fondazion
L’é na esposizion maraveousa e particolèra, chela che se pel veder amò fin a la fin de setember te Piaz dedant a la Cèsa de Comun de Sèn Jan: na scempia strutura de legn a foja de cadrat olache l’é stat metù fora 9 gran reproduzions di più bie panorames de la Dolomites. 

La mostra, che à per titol Leames Dolomitics l’é l frut del lurier e de la braùra de 9 fotografes, che vegn da vigniun di 9 sistemes che fèsc pèrt de Dolomites Unesco e che à sport i più bie retrac de crepes desche don per n cedean emportant: i 10 egn da l’emportant recognosciment.

La valorisazion de la mont l’é semper zentrèl te anter i evenc da d’istà del Comun de Sèn Jan e del Comitat Manifestazions de Poza, che da egn l met a jir na lingia de scontrèdes che à per argoment noscia crepes te si desferenc aspec e che vegn coordenèdes con braùra da la giornalista e pascionèda de mont Virna Pierobon.

Chest istà no podea esser vida miora per serèr sù la lingia de evenc che se fèr na bela viva per l cedean: en lunesc ai 2 de setember l’apuntament é peà via donca jà da les 6 da sera, canche te piaz la diretora de la Fondazion Dolomites Unesco Marcella Morandini, l’assessor a la cultura del Comun de Sèn Jan Simone Zulian, la presidenta del Comitat Manifestazions de Poza Mara Dorich, la giornalista Virna Pierobon e l fotograf Anton Sessa i à prejentà a duta la jent la bela esposizion te piaz.

Per chel che vèrda la mostra, i bie retrac de Alessandro Caon, Moreno Geremetta, Eliza Lazzari, Nicolò Miana, Patrick Odorizzi, Franco Oliveri, Andreas Tamanini, Georg Tappeiner e l fotograf “de cèsa” Anton Sessa, la esposizion resta da poder veder enscin a la fin de setember.


De più su la Usc nr 35 stampèda ai 6 de setember  (LG)