Cians, cians e amò cians

Data

13 de setember 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Tras de più se veit jent con più che un cian e i li lascia jir daperdut, zenza respet per i etres
Da n pec de egn en cà somea che l cian, per compagnìa, ejibizion o auter, l’aessa tout l post di bec…

Tras de più se veit jent con no demò un, ma doi, ence trei cians tegnui e adoré, mené stroz te bagherle…

L’é doventà na moda e no creise che sie n besegn. Emben personalmenter peisse che dant de se enjignar n cian o doi sie na motivazion dantfora e soraldut vigni patron cogn pissèr a co l tegnir, tel respet di etres… de la jent.

Sun sie tegnir dant del dut e no olache mai, sun chel di etres o de la comunanza. Entene enlongia strades olache passa duc, piazes, fora per i pré di etres, fora per i bosć, sun troes da mont, te ostarìes sot desch ite, sessaben desleé.

Chest istà n’é vedù jir te gejia e, i me à contà, ence tel Distret Sanitèr de Fascia, a snasèr daperdut, olache rua bec picoi, malé e jent de età… E a chi che ge à dit valch, resposta: »Non c’era il divieto!« Ma dijesse, l cervel e l ferstont no dijel nia?

I Comuns à pissà de meter fora cassete con sachec de plastica, per tor sù i besegnes… e chiò l’é n muie de oute i resultac, descheche se pel veder dai retrac. Sachec lascé ló apede jù o l più de le oute trac stroz, olache mai, enlongia strada, te canalete de stradon, te tombins o ti bidons per l papier, chiò e ló. La pievia slavata jù, ma la plastica la resta… Plastiches che no se desfasc… amò piec donca.

Peisse che se i tegn l cian, perdon i cians, i podessa se comprar i sachec e no che i vegne compré da la comunanza. Donca, n consei ai aministradores, tolé demez chi destributores de sachec per i cians, i fasc vegnir l’outa magon a cogner passar ló enlongia, sun strada.

E a nesc hotelieres, fitacartieres, n’autra racomanazion: dijege a vesc ghesć le regole zivile de noscia comunanza, i ultimes egn jite n muie de outes dò brea jù.

E a chi che tegn cians no i lascià jir tras sun chel di etres, sessaben tel respet de chi che no n’à, o che à tema del cian…

L’é ora brujada de meter sù na bona steora, chi con un cian bon bon, ma chi che n tegn doi o ence trei la dojessa esser de trei, cater, cinch oute maora. E tel jir stroz spere de aer n bon eie… senó la plastica… me la trapine dò… cogne me lavar i ciuzé… e me goder chel bon odor.  (Fernando Brunel)