Cater contìes de amor, n soul finèl

Data

16 de setember 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L salut de la cater bandieres del Fascia Balon: Cristoforo Debertol, Daniele Deluca, Manuel Bernard e Patrizio Cigolla taca i ciuzé al ciodo
“Setember, l’era setember, enlouta se aon lascià”, ciantèa i GoldenTrio te sia cianzon d’amor. La musega del grop fascian contèa l sentiment anter doi enamoré, ma sessaben che l’amor se pel l descorir ence te etres ciampes de la vita, podessa esser envers na pascion. Amor e pascion, doi motives che spenc la persones a dezider, a ge jir dò a la pedies del cher, a na strèda segnèda ti ensomesc e te la lum di eies de n bez. Amor e pascion l’é stat cauja e motif de la carieres de cater jiadores de balon che con l dejiderie tel davegnir i aea peà via sia strèda su n ciamp de saolon e che ades, dò n lonch temp de sacrifizi, arcedamenc e legrezes col Fascia Balon i à dezedù de tachèr sù i ciuzé al ciodo. Scomenza i campionac, ma Cristoforo Debertol, Daniele Deluca, Manuel Bernard e Patrizio Cigolla (e jon en orden de età) i no se tirarà ite la maia del Fascia chest an, che l balon l’é zenz’auter “l’ènema, ènema mia” che ciantèa i GoldenTrio, l’amor de cater enamoré de na pascion, ma chest’outa l’era ora de se saludèr, che ampò l’é ruà setember. Ve lascion donca a chesta intervista, ence mingol da grignèr, che aon volù ge fèr per i saludèr, ben segures che al Cotura i se farà amò veder e sentir.

Él restà n record particolèr de na partida o de n gol?
Debertol: N’é n muie de bie recorc. Mia pruma partida en promozion canche èe 16 egn; ogne tant me vegn tel cef ence n derby col Fiem: siere amò joen e èe fat na partida straordenèra, aon vent 3 a 1 de 10 a cauja de na espulscion, èe segnà ence gé e aane fat n gol su n mie assist con na punizion batuda coran.
Deluca: A mi me é restà tel ciaf l gol en finala de Copa Provinzia tel 2011, enlouta aon venciu a 1 menut da la fin con na mia punizion.
Bernard: Ence gio cogne me unir a Paco pissan a la trata de ciaf te l’ultima Copa Provinzia. L’é stat na lingia de robe che me restarà tel ciaf: n gol a l’ultim moment, la fascia de capitan al brac, la legreza de duc.
Cigolla: Gio… n podesse dir na serie! Tante piate asto per scriver? [l grigna, n.d.r]. Me piasc recordar i 2 goi che é segnà tel 2013 e che i ne à fat venjer l campionat passan de categorìa. Me i recorde delvers perché l’era l stadie pien e l’é stat na gran emozion.

Da ades inant vardarede da fora chi che jia a balon. Sarèl senester, o sarèl l’ocajion de aer de etres ruoli tel Fascia Balon?
Debertol: Dijon che ogne an se manèa inant a l’an dò, ma dant o dò chest pas ge volea l fèr. Gé ge dae amò na man, donca l balon l’é semper ti piesc, ma sessaben che mingol menciarà. La fadìa più grana no l’era i arcedaments, ma aer ogne week-end empegnà, vardèr de no se strachèr la dì dant de la partida. Tel davegnir… beh, Paco l’à trei fies, l farà scola-balon te vèlch an!
Deluca: De segur menciarà mingol dò 15 egn che se fasc campionac e alenamenc, ma dant o dò ge volea lasciar. Ruoli neves per l davegnir i é da conscidrar, ma ence chel doenta n gran empegn se se fasc le robe delvers: per ejempie far l’alenador doenta n empegn gran desche chel de jiar se un ge tegn.
Bernard: la pascion la resta zenz’auter, ma via per i egn valch outa l’é stat ence fadìa ge star dò a le partide: i autres i te mana foto endana le raide e tu magari tu es te furgon sot la pievia per jir a jiar. A propojit, per l davegnir, gio é 2 egn de esperienza tel vidar pulmins!
Cigolla: De segur vardar l balon da fora ades che no se jia più sarà cert. Per n trat se se paussa, tel davegnir se empegnaron a far valch. Zeche de outa ge vel dar dò chel che aon ciapà ti egn da la sozietà.


Troède duta l'intervista su la Usc nr 36 stampèda ai 13 de setember  (Daniele Verra)