La maor azienda de Fascia à avert si ujes

Data

12 de setember 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L’é peà via l’an de scola per béleche 1400 scolees e studenc e 200 anter dozenc e personal ATA. De zirca 200 i va tel nef Liceo Artistich. La Sorastanta Mirella Florian ne porta dant neves e projec 
En jebia ai 12 de setember à avert si ujes la maor azienda de Fascia. La Scola Ladina tol ite 1378 scolees e studenc da la Scolina a la Scola auta e l’à passa 200 dependenc: zirca 180 dozenc e passa 40 personal ATA. A vidèr dut l’endrez de chest setor fondamental per noscia comunanza che l’é la formazion de nesc joegn, se sà ben con l didament de duc i referenc di desvalives setores, l’é la professora Mirella Florian, Sorastanta de la Scola Ladina de Fascia oramai da 12 egn. Tel meis de aost sia encèria é stata renovèda amò per un an, e donca fazile chest sarà sie ultim an a cef de la Scola de Fascia.

Chest an de scola se aur con la bela sodesfazion de poder fèr jir i 180 studenc del Liceo Artistich, ensema a doi clasc di etres Licei, te la neva senta a Sèn Jan, che dò egn de lurieres la é zacan ruèda a compiment.

la formazion de nesc joegn l’é la costion che met dant per pruma la Sorastanta Mirella Florian. »L scomenz de n nef an de scola ne dasc l met de pissar a la gran enciaria che à la scola desche lech de formazion, de crescimonia culturala, de vita soziala – disc la Sorastanta. La formazion scolastica la cogn lurar per l’autonomia e la responsabilità a na vida che nesc joegn i posse esser bogn de tor sù empegnes de valuta, con capazità de giudizie, per saer cerner e dezider. L’é da chiò che vegn la formazion per competenzes, zenza perauter lasciar fora la costruzion de na bona dotazion de basa de cognoscenzes e de abilità. L student competent l sarà bon de se la far cà te situazion neve, mai vedude dant te chele forme. Enceben che te la sozietà d’aldidanché no sie sorì, cerion de trasmeter la pascion per l studie e la cognoscenza acioche nesc joegn madure te la cultura de la legalità e de l’atenzion envers i autres e te la partezipazion responsabola e autonoma a la vita soziala. Crese che i dozenc de la Scola Ladina, che con empegn e profescionalità se met al servije de la comunanza, te chisc egn i abie desmostrà de lurar per l ben de nesc joegn.«

De più su la Usc nr 36 stampèda ai 13 de setember  (Lucia Gross)