»Cianton da marevea« per didèr i etres

Data

09 de otober 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L projet de la sociazion INOUT se met dant de uzèr fora la pascion per ciantèr ma ence soscedèr na reflescion su la situazion de la Siria. A fin projet sarà doi spetacoi de benefizenza a Firenze e Poza
L’é pontà demez en mèrtesc ai 24 de setember l projet »Cianton da marevea« proponet dai joegn de INOUT col sostegn del Pian Joegn de Fascia La Risola e de la parochia de Poza en colaborazion con la Scola de musega Il Pentagramma e la Fondazion Giovanni Paolo II de Firenze.

Cianton da marevea l’é n percors che enterza ores de formazion e de tecnica te la disciplina del ciantèr vidèdes da esperc e na reflescion de carater sozièl su la situazion complichèda che da egn tormentea la Siria e sia popolazion. L’obietif del projet l’é meter ensema n grop de oujes joenes e de amisc che posse fèr del ciantèr n strument de condivijion, de festa, de valorisazion de la cultura locala, de solidarietà.

Da chisc fondamenc se à concretisà l’idea de proponer a fin projet doi spetacoi de cianties e sensibilisazion su la realtà siriana, che vegnarà porté dant te doi contesć desvalives: la »pruma«, endrezèda en colaborazion con la Fondazion Giovanni Paolo II la sarà a Firenze en sabeda ai 2 de november al teater del Zircol Arci de Caldine.

L staff de INOUT e la referentes del projet, Mery e Melany Locatin con Sabrina Calligari, les é dò che les regoi la adejions per la sera de benefizenza de Firenze. L viac é pervedù en sabeda ai 2 e en domenia ai 3 de november e per se enscinuèr l’é temp enscin ai 12 de otober. L cost de 60 euro a persona tol ite viac col pullman, stèr soranet te ostello e vijites vidèdes a la zità. 
Duta la comunità é envièda a tor pèrt a chest moment de festa, na oportunità per vijitèr la bela zità toscana e per tor dant la »pruma« di joegn talenc fascegn del ciantèr.

Per info e prenotazions se pel scriver na mail a ciantondamarevea@gmail.com o chiamèr l numer 349 6491192.


De più su la usc nr 39 stampèda ai 4 de otober