Trafich te Fascia: rua l Bus Rapid Transit

Data

09 de otober 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La Provinzia de Trent finanza con 40 milions la terza corsìa per i mesi publics. Anter la operes fondamentèles l’é ence la circonvalazion Ciampedel Cianacei
L’é ruà respostes emportantes enstadì da man de la Provinzia de Trent per ressolver i problemes del trafich te Fascia. Te Consei de Aministrazion de l’Apt de Fascia l’assessor provinzièl al turism Roberto Failoni l’à confermà l’intenzion de la Provinzia de jir inant col studie de la corsìa per l Bus Rapid Transit. Nia più donca ferata o impianc a fun, projec che era stac touc dant da la Comiscion mobilità del Comun general de Fascia. La Provinzia à preferì meter dant n’autra soluzion, chela de la corsìa preferenzièla per la corieres, n sistem che pel smendrèr l trafich te tempes curc e con cosć mendres respet a la ferata e ai impianc a fun. E dapò chesta corsìa, l’é stat dit, la podessa vegnir durèda ence dai mesi de socors che de spes i stenta a se mever, e fora de sajon, ence da chi che va a pe o con la roda, ajache duc doi ensema sul portoi de la rodes i se dèsc d’empaz e i crea pericol.

Dò la vijita de l’assessor Failoni aon sentù l conseier provinzièl ladin Luca Guglielmi.

"La terza corsìa pelela vegnir fata sun duta la val? - L Bus Rapid Transit l’é n projet che perveit che olache se pel vegne fat la terza corsìa e olache no se pel vegne metù semafores che dae la prezedenza direta descheche l’é te le zità. Chesta l’é n’opera che va diretamenter sui lurieres publics de la Provinzia e la é jà stata finanzièda".

"Enveze per la circonvalazion? - Per la circonvalazion gé é jà fat n orden del dì, n faré n auter con la Finanziaria per domanèr che vegne metù ressorses per tachèr a la projetèr. Aboncont peisse che nesciun assessor fin ades se aesse fidà fora con l’emprometuda de 120 milions per la circonvalazion".


Lejé l'intervista entria su la Usc nr 40 che sarà stampèda ai 11 de otober  (Monica Cigolla)