Duc a una per politica linguistica e skibus

Data

16 de otober 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L Consei general à aproà zenza gran discuscions l Pian per la valorisazion del lengaz ladin, la convenzion per i trasporc da d’invern e vèlch variazion de bilanz
L’aproazion del Pian de politica linguistica per l stravardament e la valorisazion di lengac mendres, l’era l prum pont a l’orden del dì del Consei General chiamà ite en lunesc ai 14 de otober. L ge é stat prejentà ai conseieres da procuradora Elena Testor e l’é stat aproà da duc i Conseieres a una.

Duc a una i conseieres à aproà ence la cordanza per l Servije de Skibus per chest invern. Chest servije, che ades vegn portà dant diretamenter dal Comun general de Fascia che fèsc de capofila per duc i Comuns de la val, vegnarà portà inant dal 5 de dezember enscin ai 14 de oril. La Procuradora Elena Testor à deschiarì che l ge vegn dat sù a la Trentino Trasporti, sozietà partezipèda da la Provinzia de Trent, col sistem in house, con n cost de 1.249.000 euro. Chesta speisa, che la é de 30.000 euro maora che l’an passà, ajache l’é stat jontà ite doi trates de coleament envers i impianc de Bufaure e Ciampedìe, vegn corida per 360.000 euro dal Comuns, en mesura proporzionala al numer de si ghesc’, per 250.000 euro da la Provinzia de Trent, per 259.000 euro da l’APT e se perveit che 380.000 euro vegne ite a vener i biliec. Per chisc biliec l’é pervedù na oferta sajonala per i residenc e rebasc per i sozi de l’APT.

L Conseier de mendranza UAL Manuel Farina à dit che, descheche l’à semper sostegnù ence ti egn passé, per sie cont smaoran la steora de sojornanza se podessa ge dèr a duc i ghesc l servije skibus debant, con mior parbuda per l turism de val, e se podessa ence ge fèr sparagnèr scioldi ai Comuns. Farina à domanà ence coluna che l’é la neves pervedudes per l turism trentin, soraldut en cont de la “Guest card”, ajache ge volessa che chesta abie valuta ence per i servijes sporc te Fsscia, desche l Skibus, e no sie n’autra card che fèsc demò confujion. A la domanes de Farina à responet l Conseier de procura Matteo Iori, che l’à despiegà che l sistem de la Card per dut l Trentin nasc ence dal besegn de giustifichèr i emporc che la Provinzia dèsc de retorn per la steora de sojornanza, ajache la neva normatives é semper più strentes per chi che vegn conscidré da l’Europa desche didamenc statai.

Per chesta rejon – à jontà ite amò Iori con referiment a la conscidrazion de Farina su la steora de sojornanza – ades la gestion di scioldi che vegn da chesta steora la é semper più senestra e fazile ence l’APT, che tel passà vedea de bon eie chesta idea, ades l preferesc la soluzions che no cogn sotstèr a duc chisc vincoi del publich. Aboncon – à dit amò Iori – la Card perveit endèna l trasport publich per l’istà e la cognessa ge dèr l met ai teritories de meter ite i servijes che i vel. L’assessor Failoni vegnarà te Fascia tel meis de november a spieghèr miec l’idea de reforma de l’Azienda per l Turism del Trentin.

La Conseiera de procura Lara Battisti à prejentà vèlch variazion che va amò sul bilanz de chest an 2019, e più avisa la entrèdes che rua ite dai Comuns per l servije de Skibus (€360.000), per l Fondo perequatif per la mendranzes (15.000) e per refoner na mendra entrèda ruèda a vener refudam (15.000). A chisc se jonta l’integrazion ruèda da la Provinzia de Trent per finanzièr l Pian de politica linguistica (10.655). L mudament maor revèrda ampò en cont capital l spostament de 1.350.230 euro del Fondo Strategich, per projec che i Comuns de Moena e Cianacei no à portà a compiment del 2019 e che é donca stac sposté al 2020. Amò per 30.000 euro destiné a studièr fora e comprèr i totem de valuta identitèra e turistica da meter sul tegnir de Fascia l’é stat demò mudà l capitol e na pèrt de l’import pervedù per i stipendium che no vegnìa durà l’é jit a corir maor speises per la mensa de la scola. Dò vèlch domana de deschiariment portèda dant dai conseieres Thomas Amplatz e Nicola Zanoner, ence la variazions al bilanz é states aproèdes duc a una e l Consei general se à serà sù zenza de autra comunicazions.


Su la Usc nr 41 stampèda ai 18 de otober l'aprofondiment sul Pian de politica linguistica  (Lucia Gross)