Joegn fascegn cianta per la Siria

Data

08 de november 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
N bel grop de touses e fenc de noscia val à portà con suzess te la Toscana l spetacol del projet »Cianton da Marevea«. En DOMENIA la replica a POZA.
L nef projet de la sociazion INOUT, che à tout ite na ventina de joenes e joegn de Fascia, à inom »Cianton da marevea» e l’é stat pissà e portà inant con gran pascion e dedizion da trei touses da Poza: Mery e Melany Locatin e Sabrina Calligari, con l’obietif de meter en pe n grop de amisc e ciantarins che posse peèr via e crescer te n percors de formazion tecnica per poder, apontin, ciantèr da marevea. 

L cors l’é peà via tel meis de setember e l’é stat portà inant da Samantha Pederiva, ciantarina e maestra de cor fascèna: tel curt temp de n meis e mez l grop de ciantarines e ciantarins fascegn à arjont n bon livel, tant da poder se prejentèr al publich te n spetacol dassen aprijià.

Dut l projet no se à ampò limità a l’aspet tecnich e musical, ma l’à volù meter apede ence n valor de più: chel de la solidarietà.

Ensema con la Fondazion Giovanni Paolo II e con la parochia de Poza, Fascia à donca podù jir inant sul troi envià via del 2016, canche i joegn de la Scola ladina de Fascia aea portà a Betlem l spetacol »L prum Nadèl«, crean n leam fon anter noscia val e la Palestina.

Chest leam é stat recordà ence te la Toscana en sabeda ai 2 de november da Renato Burigana de la Fondazion Giovanni Paolo II, canche l grop de joegn fascegn, per endrez del president de la sociazion INOUT Thomas Zulian, l’à portà en antepruma l’ejit del projet »Cianton da Marevea« tel teater del Circol Arci Casa del Popol de Caldine, a Fiesole, te n spetacol a sostegn di projec per didèr i bec de Aleppo, te la Siria.

L’apuntament coi joegn de »Cianton da Marevea« e con Valentina Barlacchi e si amisc musizisć l’é en domenia ai 10 de november te oratorie de Poza da les 20:30. Ence te chest cajo l’entrèda sarà a oferta ledia per sostegnir i projec per i bec de Aleppo. No mencià!


De più su la Usc nr 44 stampèda ai 8 de november  (Lucia Gross)