Aloch, la Bufaure vèrda inant

Data

09 de november 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Enstadì l’é stat dat sù con bando regolèr la gestion del portoi de Aloch per doi egn. La sozietà fascèna vel valorisèr semper de più chest portoi, pont de referiment te Fascia
Enstadì l’é stat dat fora la neva de la assegnazion de Aloch a la sozietà Funivie Buffaure. L portoi ge dèsc alberch a garejèdes de Copa Europa, desche l slalom di omegn che chest an l sarà ai 16 de dezember, ma ence ai arcedamenc de la Nazionèla talièna de schi alpin tel chèder del projet “Piste Azzurre” portà inant con la FISI (Federazion Talièna Sport da d’Invern), a chi de atlec de autra squadres internazionèles e a chi di ski team locai. Se enten donca l’emportanza, tant strategica che sozièla, del portoi de Aloch che ge é stat dat sù enstadì per doi sajons a la sozietà Bufaure dal comun de Sèn Jan con n bando regolèr.

La sozietà portarà inant l’empegn de gestion tegnan cont de la valuta del portoi de Aloch, con vèlch cambiament respet al passà. »Noi cardon te le potenzialità de Aloch – à dit Christian Lorenz, president de la sozietà Bufaure – soraldut dò i investimenc fac da pech de vèlch milion de euro per l miorament del portoi«. La desvalivanza la sarà enveze tel modus de la gestion, con la neva del didament de n colaborator: »L portoi l va desfrutà al miec, l’idea l’é chela de smaorar l’atività ge dajan alberch ence a neves schi club, sozietà e utenc enteressé a garejade e alenamenc – disc amò Christian Lorenz – per chest aon dezidù, a desferenza di egn passé canche se cruziane noi enstesc de la gestion, de verjer na colaborazion con na persona competenta desche Sergio Liberatore«.

Su la costion se à pronunzià ence l’ombolt de Sèn Jan, Giulio Florian, dò l’assegnazion del bando. Giulio Florian l’à sotrissà la gran valuta del portoi Aloch no demò a livel economich e sportif, ma ence comunitèr per i joegn fascegn e la sociazions che ge dèsc l met de crescer desche sportives e persones: “Per nesc bec e arcedadores l’é fondamental poder far afidament, jà da la fin de november se l’é le giuste temperature, su n portoi te val che doventa n pont de referiment costant e l ge dasc a le familie l met de tegnir più basc i cosćde trasferimenc di bec sui giacees”. N pensier l va aboncont ence a la pèrt de marketing e svilup, col Skistadium Aloch desche vedrina promozionèla de Fascia ajache, disc l’ombolt, l’event mondièl de la categorìa Juniores de firé passà l se à desmostrà de gran valuta per la parbuda e la crescimonia no demò de chest portoi, ma de duta la val de Fascia.


De più su la Usc nr 44 stampèda ai 8 de november  (Daniele Verra)