Co èla la situazion de l'èga a...Mazin, Soraga e Moena?

Data

11 de november 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Amò la situazion de la èghes, con autres trei comuns de Fascia. A Mazin la fontènes é dutes tel crep, a Soraga dut sot control co na app, a Moena mai stat èga entesseèda.
Jon inant chesta setemèna con la raida fora per i Comuns de Fascia per veder la situazion de la èghes. Per l paìsc de Soraga sion jic a domanèr fora l’ombolt Devi Brunel, per i comuns de Moena e Mazin aon sentù i ofizies tecnics.

En cont di problemes de contaminazion vegnui fora chest istà a Sèn Jan, Lorenzo Pederiva, del Servije Tecnich de Mazin, ne à contà che »le sorgenti le é dute sot tera donca pel sozeder che su per chisc monc, olache l’é bestie che vif, sie ence escremenc, carognes, per dir ence chele che se à magnà l louf, e c.i. per chest podessa se verificar valch sort de contaminazion de l’aga. L’é ben vera che l’aga passan pian pian te anter l teren la se neta fora ma canche vegn gran pievete l’é fazile che duta chela superfiziala che cor de pien la se tole dò ence valch de auter.«

Te Comun de Soraga - ne à contà enveze l'ombolt Devi Brunel - sion metui ben con le aghe. Acà trei egn aon endrezà n sistem de telecontrol che ne permet de monitorar la cantità de aga e ence de comanar i ventii. Ogne bosserlait l’é monitorà, vegn controlà l’aga che vegn ite e chela che va fora. Te le vasche l’é ite sensores che mesura l’aga e che mana segnai radio, sun cuert de comun l’é na antena che ciapa chisc segnai e con na aplicazion sul computer o sul fonin vedon en temp real cotanta aga che se é dò che se consuma e cotanta aga che va ite da le fontane. Amò apede con chesta aplicazion, da la postazion te comun, sion bogn ence de verjer o serar i ventii di bosserlaic. Podesse esser che magari te sajon se dora più aga te na zona de paìsc e manco te n’autra e donca se pel la regolar. Chest sistem l’é n muie de utol soraldut tel cajo che crepe fora n mal de fech ajache ogne bosserlait l’à su ence valvole contra l mal de fech. L’é vasche en più, vejin a chele normale, che se fossa de besegn de aer più aga se pel le verjer e manar più aga ai idranc. Dut chest zenza cogner jir sul post. L’aplicazion la é del comun e te chest moment la dora demò chi de comun, no aon volù la dar fora ence percheche anter l’auter sion de trei te Jonta che é ence Studafech. Da dir che te Soraga aon n sistem mescedà de control percheche aon amò ence scambiatores fora per paìsc che é amò manuai e soraldut se dora chi aló per regolar la cantità de aga.

Per chel che vèrda l comun de Moena aon sentù enveze Marco Chenetti, referent per l patrimonie e la gestion del teritorie, bosserlaic e èghes neigres e biences, che l ne à dit: "A Moena no l’é »scarichi« a mont de le sorgenti, aon le canalisazion spartide. Da le frazion l’é dute le èghe negre, da Peniola, da Medil e c.i. e per chel che varda le èghe bience, canche l piöf ju dai cuerc, ti posćforavia le èghe rua ti rives con so canalisazion comunale. Le èghe negre, ence chele de Sèn Pelegrin, le va al depurator ju a la Direta. La Provinzia l’à fat la re da Sèn Pelegrin fin a Moena e dute le ciase che podeva le é state tacade int, le autre le à la vasca Imhoff, ma n’é bele dotrei.


Lejé duta la piata de intervenc su La Usc nr 44 stampèda ai 8 de november   (MC/CRI.M)