N »AlberEL« per viventèr l bosch

Data

14 de november 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
A n an dal tormen Vaia, te Museo ladin l’é stat portà dant la situazion e prejentà n projet per sostegnir l’embosćiament te la Mont de Poza
Linda l’à na firma de produzion de ceramica, la se à enciasà te Fascia del 2018 con sia familia e l’à orì laboratorie e boteiga a Poza con l’inom ELEL. Te Museo, ensema con so fi Francesco, l’à contà che canche l’é stat l tormen Vaia i é resté n muie tocé, dal dan ma ence da la gran resposta de duc i volontadives de noscia comunanza, e i se à pissà per chest de fèr ence ic vèlch per l bosch, se sà ben con chel che i sà fèr, donca lurèr la ceramica. 

L’é nasciù coscita, amò chest istà, »AlberEL«, n oget te doi fojes e desvalives colores che rechiama apontin n picol èlber. Chest istà i à tacà la produzion e i à fat na cordanza con la Frazion de Poza per ge dèr na pèrt del vadagn recavà a vener ogneun de chisc picoi èlbres fac e depenc a man, didan a chesta vida a corir i cosć per empiantèr neves èlbres te la Mont de Poza. 

Vigni »AlberEL«l’é n toch unich, numerà e leà a n biliet che atestea la partezipazion a la scomenzadiva e che met en esser n leam personèl col bosch che nasciarà endodanef te Saùch, l lech cernù fora per l projet.

L’istà passà i ghesćà responet a na vida straordenèra a chesta idea e la familia de Linda l’à abù n gran da fèr a ge stèr dò a la produzion. Ades, en ocajion del cedean, la scomenzadiva é stata prejentèda a la comunanza de val e l’é stat orì ence n sit internet dedicà a chest projet. 

Amò apede l’é stat enjignà na verscion particolèra del »AlberEL«,fat con na laca spezièla de dolomia che crea n efet unich e che sarà da troèr demò te Museo ladin.

L projet »AlberEL« l’é stat aprijià da duc per sie valor economich ma ence per l valor simbolich, n segn de la renasciuda de nosc bosch e de la comunanza dò l grief event del tormen Vaia.


L'aprofondiment de la scontrèda te Museo su La Usc nr 44 stampèda ai 8 de november  (LG)