Autres colores ti pré de Fascia

Data

21 de november 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Dò na bona carantina de egn che no se vedea più ciampes de òrc e siala, Sebastian e Stephanie Ghetta ne conta coche i se à arvejinà endondanef a chesta coltivazion
I più de età de Fascia e de la valèdes da mont de la Dolomites i se recorda segur di colores che dò mez istà via peaa ciampes, ciampopré e ciavezegne enlongia jù nesc paìjes. Colores endoré, l’era le vare enlouta coltivade a òrc, forment e siala. Dò mez aost via, se seslaa e nosce giave e besave le ciolaa le mane e le fajea su ae. Le bele ae me le recorde, en bela fila a 4-5 pasc una da l’autra.

Retrac che documentea n’é giusta teis, dai prumes retrac del gran fotograf Franz Dantone Pascalin ai fotografes di egn ’30, ’50 e ’60, di Ghedina, de Alessio Bernard o de n muie de turisć armé de foto aparac che nesc antenac no podea aer ajache i aea auter da far che far foto.

Ence te mie recorc canche ere bez da sera se jìa a jiar a sconet anter ae o marudìe de fegn. E vardar e sentir ferlar te aa l’era na musega che no se sent più da n pezon: tich, toch, tich, toch… na musega che se sent amò anchecondì l’é demò chela del sonar de le ciampane.

Ultime ritadine de chela cultura da bacan, semenar, seslar, ferlar l’é stat la Lis dal Vera e dò sie fie Assunta e Mariateresa. Documentazion e filmac é stat touc sù ti egn ’80 da l’Istitut cultural ladin. 

Autres tempes… Ma da doi egn chisc colores endoré s’i veit endò chiò e ló te la Val de Sot. A Mazin, sun Sorapoza, sul Piz de Vich e Costa de Vich, ti ciampes de Soverei, tai Pré, coche disc chi da Soraga. L’é i ciampes che Sebastian Ghetta de la Filo da Vich l coltiva, na sia scomenzadiva frut de na vijion emparada e pissada endana si studies te l’Inghiltera acà i 15 egn. L’é vegnù deretorn te Fascia co la convinzion de meter a frut che che l’à emparà e l’à defata domanà l didament di sie de ciasa, sie pare Franco e la giava Bepina da Meida.

Anchecondì Sebastian e sia sor Stephanie i à metù en pe na atività da bacan, i coltiva desvalives ortames e fruc, i à n pastrec de ciaure e feide, i fasc formai e da 2 egn i semena òrc e forment. Col didament de la familia i à frabicà l’agritur Soreie tel bosch de Soverei, bosch che l Comun de Vich à endrezà per i bachegn, ló enlongia l’é n’autra stala de n bacan da Poza.

Coi frades Stephanie e Sebastian me troe te stua de la neva majon, i me conta de coche i à scomenzà e de coche an dò an i à metù en esser chel ensomech che i aea tel ciaf da egn, canche Sebastian jà acà i 15 egn, l studiaa agraria te n famous istitut de l’Inghiltera.

"Sebastian canche t’es vegnù deretorn te Fascia, colun él stat l prum lurger che t’as metù man? - Son defata pontà via e é arà sù n ciamp de mi barbes sa Meida, na vara de presciapech mile metres cadrac e é metù jù frae. Le é vegnude bele, douce e le venaane te n piaz de Vich o de Poza. Per l’an dò é pissà a ortames ence percheche besegnaa mudar teren. Chesta vertola la ne à portà a vener te piaz di paìjes de la val e ai restoranc fruc e ortames cresciui chiò te val. Gio ge stajee dò ai ciampes e mia sor Stephanie d’istà la pissaa a i vener con n picol stont".

"E tu Stephanie co aste scomenzà? - É scomenzà a lurar con Sebastian canche fajee l’università jun Busan, d’istà aee temp e jìe te ciamp a regoer, dejerbar e dò a vener te piaz di paìjes. Dò aer fenì de studiar, dessema a Sebastian aon pissà a se endrezar na majon, aon frabicà acà dotrei egn l’agritur e ge aon dat inom “Soreie”. D’invern fae la maestra de schi, ma l’auter temp me cruzie de far jir la majon, aon ence 8 cambre per ghesć, gio ge stae dò a dut che che fasc de besegn, son ciapada ite al 100 per 100. Te familia che deida dò l’é ence mie pare, mia mare e ence mia cugnada. Sebastian se cruzia de stala e tobià".


Duta l'intervista su La Usc nr 45 stampèda ai 15 de november  (Fernando Brunel de la Riza)