L’Istitut cultural ladin te man del Comun general?

Data

14 de november 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L conseier provinzièl ladin Luca Guglielmi portarà dant n dessegn de lege per passèr la gestion de l’ICL da la PAT al Comun general. Na declarazion che à envià via l debatit
Te chisc dis che vegn prejentaré n dessegn de lege per ge passèr la gestion de l’Istitut cultural ladin »majon di fascegn«al Comun general de Fascia. L’é stat la declarazion del conseier provinzièl ladin e secretèr politich Luca Guglielmi a la Radunanza generèla de la Sociazion Fassa.

A La Usc di Ladins Guglielmi à spiegà che »La lege perveit che l’Istitut cultural ladin posse esser n ent diretamenter strumental del Comun general de Fascia.Te chest moment te Consei de l’Istitut ladin rua ite doi raprejentanc de la Provinzia de Trent, un con funzion de president e un de conseier, un de la Region Trentin-Sudtirol, doi nominé dal Comun general e un nominà da la Comiscion culturèla. Se l’Istitut doventassa ent strumental del Comun general de Fascia no aessa sens che l president vegne nominà da la Provinzia, a chela che ge restassa aboncont istesc doi nomines da fèr o ence demò una, sion dò che valuton. Nesciun control politich del CGF su l’Istitut ladin donca – à rebadì Guglielmi - ajache chest vegn jà fat da sie President e dal Consei de Aministrazion, ma demò chierir de arjonjer n obietif che peisse posse vegnir aprijià da ogne moviment politich del teritorie, che fossa ge garantir al Comun general de Fascia maor competenzes e più autonomìa.«

l conseier de l’ICL Andrea Rizzi à fat la proponeta de ge manèr n document ofizial a la Provinzia olache vegn domanà che tel cajo che vegne fat na reforma de l’ICL vegne sentù dantfora l’Ent e chi che laora laìte e che sà dir chel che va e no va. »Da na man aer n referiment più apede sul teritorie podessa esser n vantaje – à dit Rizzi – ma podessa doventar ence n empediment per la gestion finanziaria per via che l Comun general no à ressorse sie e donca l cognessa semper ge le domanar a la Provinzia e chest creassa amò n auter passaje burocratich. Piutost l’Istitut aessa gran besegn de n slejieriment burocratich e per chel che varda la gestion di contrac: amedit ge volessa lurar dant de dut da chest vers.«

Ence l vize president de l’ICL Francesco Dellantonio à tout posizion dijan: »Personalmenter veide a na vida positiva la scomenzadiva del conseier ladin de domanar maor competenze per Fascia. La lege provinziala per l goern de l’autonomìa tel Trentin del 2006 ne sporc su n piat d’arjent la possibilità de se autogoernar en cont de desvalive materie. Se se vel dalbon desmostrar capazità de autogoern, l’é fosc l moment giust per scomenzar a portar a ciasa le funzion e le competenze pervedude laìte. Chest vel dir voler doventar madures, aer maor autonomìa e soraldut maor responsabilità per i ladins de Fascia«.

L president Fernando Brunel l’à dit che »fèsc marevea che l conseier provinzièl ladin aesse fat chesta declarazion zenza se confrontèr con i organismes de l’Istitut, a scomenzèr da dut l Consei de Aministrazion, olache l’era jà stat descoret e portà dant dubies su la costion. Segur fossa da scutèr ence chi che te chest Ent laora da egn e i podessa didèr a meter a fech i problemes che ti ultimes egn fera semper de più l’atività al ben del lengaz e de la cultura ladina, che l’é chela che ge stèsc a cher a l’Union di Ladins«.


Troède l'articol entriech su La Usc nr 45 stampèda ai 15 de november  (Monica Cigolla)