A Mario, testamonech prezious

Data

22 de november 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Recordan Mario Dellantonio de la Ninotes, se n jit per semper enstadì da sia majon ta Penìa, l’antropologh Cesare Poppi ne aur la fonestra su n toch de storia de noscia jent
É cognosciù Mario de la Ninotes che ere giusta ruà ta Penìa, a mez di egn '70, per binèr sù, te chel ultim ciastel lo che ‘più in ite no l'é nia’ chel che restèa de la contìes populères de Fascia. A Mario son ruà per via de sie père, l mai desmentià Bepi Bandèr, l segat che zeche turist con spirit da romanticherìes aea sagrà co l'inom de ‘Bepi delle capinere’ (e no se à mai sapù perché e percò). Bepi sarà ben stat n personaje ‘romantich’, ma segur no del vers che podessa esser evocà da chela sòrt de ucìe: spevech, chiet, essenzial fin tel megol: cica te bocia (mai vedù se empeèr n zigaret entrìech, demò chiches) e via inant e endò enlongia l cèr de la sia. 

Co la sia Bepi l'aea n raport simbiotich. De el resta na lingia de retrac lo che se l veit contra la fenestra del sgabuzin, sperfonà te na ghèba de fum braus: l'é n inn a l'acort, contìa de na vida de lurèr en armonìa co la Machina, na machina amò umana.

Na vida de entener l lurier béleche reversa respet a chela che caraterisèa sie fì Mario. Spedient, determinà, a outes nervous: pecia stories e ‘avanti col scavo’. Carateres desferenc, ma ence momenc desferenc che à caraterisà l'esperienza de lurier de generazions desferentes.

Anter Mario e gé che scrive l'é nascià donca na vejinanza che demò l carater straordenèr di egn de l'aisciuda ladinaà podù favorir. Fosc ne arvejinèa l fat de esser a vèlch vida duc e doi ‘da Moena’: el per esser fì de un moenat strapiantà ta Penìa (‘jit cuch’, descheche i dijea enlouta), gé per via che proèe (amò piec per la ureies de zachei) a rejonèr te n auter idiom. E de segur ne à arvejinà l'aer entenù che de n vers o de l'auter se era rué sun l'or de na cresta: el su l'or de n mond desvalutà, gé  col pensier che l rescat fossa stat de la mans de pec, dassen pec testamonesc.

Recorde franch la pruma outa che Mario me à menà te chel cartier bas ite lo che i stajea d'istà, endèna che sun aut i fitèa ai Sciores. La ciacolèda che é abù con sia ameda Maria – la gran Ninota che parea amò rejer ‘chi de la Ninotes’ co la medema autorità de tempes e lesc antiches – l’é stat per me, joen antropologh, desche na iniziazion. Dal corp schermolin, verjumà da n mèl zenza fin, se levèa la ousc che contèa de la bregostènes engianèdes dal festont crudel de Istes. Dai ores de na jaga de n malà del secol XX, tel scur serà ite te na cambra, con Mario enlongia che me didèa a entener n cazet strent da no creer, la Storia de l'Ozident che aee studià sui libres doventèa vita vivuda, esperienzes, temes e trìcoles che esistea dalvera. Dev'esser amò, zaolà, na registrazion de chel event.

L'é semper stat pecia paroles te anter de nos. Fosc timpruma, da pèrt mia, la sudizion envers n carater grovech, beleche ombrous. Da la sia, l chierir de capir che che mai volea chest “pènchie” che ampò fajea cont de no esser n turist. Aboncont, per me – joen e fora de post descheche se era enlouta – se sentir dèr del “pènchie” da chi che te aesses volù esser stimà tant che tu enstes te stimèes, no l'era giusta sorì. Ma la mediazion de la cara Maria Assunta – pazienta, ascorta e de cher – à podù a vèlch vida misteriousa cojir na trama che da ló a n trat aessa fat doventèr Mario un di pilastres sun chi che fossa stat frabicà l Museo Ladin de Fascia – e l rest l'é na storia che saon.

Per mez, con e dessema a Mario é capì che da spes la paroles serf demò – ence se no l'é pech – a chierir de smusèr i ores olache se troa incomprenjions e distanzes, sospec e resserves un ti confronc de l'auter. Enlouta vegne pura l rejonèr. Ma canche Mario me à perferì de jir a stèr te la ‘Cambra con Vista’ più bela de Fascia – chela che vanza fora sui palanc dal tobià de la Ninotes che dovessa essere declarèda (chela scì!) ‘arpejon de Noscia Jent’, de nos etres che saon e aon vedù e podon dèr testimonianza, canche l me à perferì chela cambra con n contrat che à durà diesc seconc per n trat de temp che per me vèl desche na vita, ben... chel l'é stat n moment ló che é entenù che ence i ‘pènchies’ pel troèr sie dret lech.

Detalpai Mario. Te ne menciarès. Descheche spere de te mencèr mingol ence gé.  (Cesare Poppi (trad. Fabio del Goti))