Sutar per Aria, l spetacol

Data

22 de november 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
I joegn che à tout pèrt al projet de INOUT e La Risola porta dant en domenia ai 24 de november te Oratorie de Poza n show acrobatich che fèsc ence pissèr a la dependenzes da video games
L’é ruà beleche a la fin l projet »Sutar per Aria!« che la Coprativa Sozièla INOUT à endrezà via per l’uton con l sostegn del Pian de Zona La Risola per i joegn anter i 12 e i 16 egn.

Chest projet é nasciù per ge dèr lèrga a na pascion che cresc semper de più anter i joegn d’aldidanché, che l’é chela de fèr acrobazìes e sauc e viver coscita a na vida estrema n element te chel che per solit no sion usé a se mever: l’aria. Da la evoluzions sui schi o su la brea, ai sauc mortai sui trampolins, da l’acrobatica jabas fin ai sauc da gran autezes e parkour. Chisc sport tira semper più pascioné e dachelanvìa l grop de jocolieres de Fascia de Circensema se à pissà de se meter en jech e de meter duta chesta ativitèdes tel projet »Sutar per Aria!«.

Ensema ai sauc e ai pirles i joegn de INOUT à volù fèr ence na reflescion sun n tem n muie atual, chel de la dependenza da video games. De spes se se desmentia de n rejonèr, somea che sie amò n tabù. La persones peissa che sa mont chisc problemes no i rue, ma no l’é nia de più faus. I jeghes che va de più te chest moment l’é chi de vera, batalia e combatiment, da chiò l’idea de l’inom »Sutar per Aria!« che no vel aer purampò n segnificat negatif, ma l vel dèr fora n messaje fon: fajon esploder chesta dependenza, se n libron fin canche sion en temp. Co pa? Col sgolèr, se arcedèr, sutèr e se goder, ensema.

Chest percors de sensibilisazion e prevenzion l’é stat possibol de gra a la strenta colaborazion con la Coprativa Sozièla Le Rais, en particolèr con l psicologh Federico Comini, che ge é stat dò al grop te dut l projet. I à lurà sui dac che revèrda l jech, i se à enventà prozesc a la consolle de jech desche te n vero tribunal col meter dant la caujes e i risesc leé a la doura de chisc video jeghes. L psicologh l’é stat dalbon n muie de utol, ence canche l’é stat ora de fèr acrobazìes, ajache ment e corp cogn lurèr ensema, cogn se didèr per creèr l moviment perfet. Corp e ment, singol e grop, ensema se laora miec, se se gode de più e se empèra più en prescia. Chest per via di neurons spieieche fèsc a na vida che se copie automaticamenter l’azion giusta del compagn, l’om defat l’empèra ence demò a ge vardèr ai etres e ge fèr dò. L grop l’é la pruma soluzion a l’isolament da video games.

L’é nasciù coscita neves talenc, ma soraldut i joegn à abù l met de se cognoscer, de spartir momenc de jech e de reflescion, de se meter a la leta di etres, de se fidèr e de se didèr l’un co l’auter. Chest l’é l più gran obietif arjont, fèr entener la desferenza anter i video games e la realtà, demò chest’ultima dèsc la emozions più fortes percheche se à apede valgugn che les spartesc con te e te les recorda.  

Ensema l’é stat endrezà scontrèdes de parkour, acrobalance de grop, acrobatica jabas e per aria e ogne joen o joena, en dut na ventina, à troà chela atività che più che pièsc e ge doventa miec. Dassen n muie aprijié l’é stat i alenamenc te palestra con l’atlet Devid Calzavara e coi joegn de Circensema. 

I joegn é jic ence a Egna a l’Easy Jump, n zenter de trampolins, e a Trent a Bolla di Sapone, senta de la scola de circo e lech olache se pel troèr ogne strument e strutura a la leta.

Ades l projet se sera sù con l’ultim spetacol che vegn endrezà en domenia ai 24 de november da les 20.30 te Oratorie de Poza. Sarà na esplojion, na bomba de emozions, de movimenc, de batudes che enviarà via ence na reflescion anter i spetadores. N spetacol che farà sutèr per aria la dependenzes da video games. No mencià!  (TP)