Secondo cors per la picola Università ladina

Data

03 de dezember 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Orì te Fascia l’an academich de Antropolad, l cors de auta formazion sot la direzion del professor Paul Videsott
En vender ai 22 de november a Sèn Jan, tel liceo de la Scola Ladina de Fascia, l’é stat orì ofizialmenter l’an academich de Antropolad, l’auta formazion sun lengaz, cultura ladina e antropologìa per ensegnanc e operatores che laora tel raion ladin.

L professor Paul Videsott, Degan de la Facoltà de Scienzes de la formazion de l’Università ledia de Busan e diretor de Antropolad, l’à portà dant con sodesfazion i dac del prum cors, che se à dejout ti egn academics 2017-2018 e 2018-2019, olache à tout pèrt 67 studenc e beleche l 97% à abù ejit positif: n resultat dassen aut e sora la media. Ence l secondo cors, peà via ades, à vedù na partezipazion auta con beleche 40 scric ite. Per livel di ensegnamenc e di dozenc – l’à dit Videsott – chesta l’é na vera picola università te la Ladinia, nasciuda per volontà de l’Istitut Cultural Ladin e de la Scola de Fascia de gra a la cordanza anter la Universitèdes de Busan e de Trent, col sostegn de la Provinzia de Trent. Videsott l’à fat a saer che tel comitat tecnich de Antropolad, ensema al medemo Videsott e a la referenta de l’Università de Trent Patrizia Cordin, l’é stat nominà ence Fernanda Favè per la Scola Ladina de Fascia, Simonetta Iori per l Comun general de Fascia e Paola Gualtieri del Servije mendranzes linguistiches de Trent per la Provinzia.

L’avertura ofiziala del secondo cors de Antropolad é jita inant con la prejentazion de n strument didatich de ecezion, metù ensema e dat fora da l’Istitut ladin per endrez del diretor Fabio Chiocchetti apontin per l’auta formazion ladina; se trata del prum volum di »saggi« de l’antropologh e dozent del cors Cesare Poppi. Sun chesta neva publicazion jiron ite più a fon l’outa che vegn.


De più su la Usc nr 47 stampèda ai 29 de november  (Lucia Gross)