Develpai ai ciantores de gejia

Data

03 de dezember 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L Cor Sènc Piere e Paul à festejà Sènta Zezilia con la messa e la marena 
Ence chest an la festa de Sènta Zezilia l’é stat l’ocajion per l Cor Sènc Piere e Paul da Soraga de se troar ensema e onorar la Sènta Patrona de la musega e del bel ciantar. En domenia ai 24 de november i ciantores à animà la messa grana a na vida dassen solene sot la direzion del nef maester Michele Pellegrin. Don Erminio Vanzetta ge à dit n bel develpai ajache no i mencia mai de sporjer sie servije te dute le zelebrazion de la comunanza e no l’é segur sorì esser semper prejenc e se tor fora l temp. Chest an tel Cor de gejia l’é jit ite doi neves ciantores: Patrizio Brunel e Franz Dellantonio, che à portà coscita l numer de ciantores a 24.

A la fin de la zelebrazion l maester à volù ge sporjer sie rengraziament a duc i corisć e a la organista Svetlana per l’empegn e la dedizion, ma soraldut l’à volù rengraziar trei persone che à arjont n travert emportant: Pierina Pederiva per si 55 egn de servije, Luca Pellegrin per si 20 egn e Roberta Pellegrin per si 10 egn de empegn tel Cor. Pierina no la era a messa ajache te chest moment no la pel se mever e donca dò funzion i corisć ge à fat na sorpresa, i é jic a la troar a ciasa e i ge à sport na bela targa. I ge à fat gran festa, i ge à dit che i la speta pa endò prest te gejia e ensema i à ciantà en legreza.

Dò messa i se à troà duc chenc a l’Hotel Latemar per na bona marena olache i se à godù en compagnìa, l’era ence l’assessora de Comun Sandra Bussolon. I à endrezà la ola de la fortuna con de bie pesć, anter chisc n muie de cape da color che i à volù se meter sul ciaf per far n bel retrat de grop. 

L maester Michele Pellegrin à dit che fazile chest’aisciuda che vegn vegnarà endrezà na fradaa con n auter Cor de gejia e dapò, canche le sarà dute vertie, vegnarà ence prejentà le neve mondure.  (Monica Cigolla)