L vize procurador vegn cernù anter l Consei de procura

Data

05 de dezember 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L’é un di mudamenc al Statut del Comun general più emportanc aproé endèna l’ultima sentèda
Endèna na sentèda caraterisèda dal confront avert e respetous, i conseieres del Comun general de Fascia à aproà en jebia ai 28 de november i prumes mudamenc al Statut de l’Ent luré fora da la Comiscion istituzionèla. N vèrech emportant ajache l’era la pruma outa che vegnìa portà dant mudamenc a chest at giuridich de fondamentèla emportanza per l’organisazion e l funzionament del Comun general.

»L’é stat fat n gran lurier – à dit la procuradora Elena Testor – ge aon lurà dò n an per ruèr a na conclujion condividuda da duc, l’era de besegn de fèr chisc mudamenc percheche te chest prum an de legislatura aon vedù coluna che l’é la maor critizitèdes.«

N confront respetous, dijaane al scomenz, percheche l mudament più emportant che à avert la discuscion l’é stat chel de la nomina del vize procurador che dant vegnìa cernù anter l Consei di Ombolc e che da chiò inant enveze l vegnarà nominà anter l Consei de Procura, l’orghen politich de l’Ent. Te l’articol 15 l’é stat tout via l coma 2 e jontà ite l coma 1 bis che disc che »l procurador nomina, anter i componenc del Consei de procura, n vize procurador che tol sie post ti caji che sie de besegn per tempes determiné e ti etres caji pervedui te l’art. 17«.

Ence l president de la Sociazion Fassa Armando Mich à volù palesèr très n comunicat la sodefazion per l’éjit de la sentèda del Consei del Comun general de Fascia che à aproà, per la pruma outa da sia costituzion, vèlch mudament al Statut, soraldut chel che revèrda la nomina del vie procurador. »Mudamenc che é rué te Consei dò na longia e menuda discuscion te la Comiscion istituzionala che à lurà per l ben comun, sorafora i colores politics e de chest son n muie content – disc Mich. Chisc mudamenc é rué su la spenta del Consei de procura, dò 4 egn de aministrazion, con l’obietif de garantir a chi che vegnarà dò, na situazion più lijiera e scempia, n at de gran responsabilità. Son content ence per l fat che la discuscion e l’aproazion te Consei sie stata portada inant con n dialogh pazifich e costrutif sun n document concordà, ma volù e sotescrit da 8 conseieres del moviment politich che raprejente. L Comun general cogn, fosc, se taèr fora amò sie spazie de azion ma peisse che chisc mudamenc del Statut sie n emportant vèrech inant envers n Comun general più atif te la vita aministrativa de noscia Comunanza.«

Articol entriech su La Usc nr 48 stampèda ai 6 de dezember  (Monica Cigolla)