Che bela festes!

Data

07 de dezember 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Cianacei e Vich à fat festa per sia jent de età de gra al didament de sacotenc volontadives.
Cianacei festeja sia jent de età: en domenia ai 24 de november l’é stat la tradizionèla festa de la jent de età del comun de Cianacei e de sia frazions. Da mesa les 11 duc se à binà te la gejia del Sacro Cher per la messa grana, zelebrèda da don Mario.
Dò la messa e la solita bela foto de grop, la compagnìa se à tramudà te la scola populères, olache l’é stat endrezà l bon bèst. Zirca 180 persones à tout post sui desć, endrezé da na trentina de volontadives anter cheghes e cheleres. A viventèr la festa l’é stat la musega aiegra del joen sonador Simone Soraruf de Gries con l’orghen da mantech.
No l’é mencià i descorsc de l’autoritèdes, pean via da l’ombolt Silvano Parmesani, n muie benvolù da la jent de età per sie fèr gustegol e semper avert, che l’à portà l salut de l’aministrazion de Cianacei e chel a un a un de duc i conseieres, tant de la maoranza che de la mendranza. Con chisc, l’à dit, l’é stat n bel raport de colaborazion, utol per aministrèr l teritorie con amor e atenzion.
A la marena l’era ence don Mario, content per la festa e per sie segnificat: »Chesta l’é dassen na gran ocajion, soraldut per valgugn che via per l’an à pecia possibilitèdes de jir fora de cèsa e aer n raport de festa e legreza con la comunanza. L’emportanza de sozialisèr la é de basa a ogne livel, da chi più joegn a nesc veies, che da scomenzadives desche chesta i vegn fora renforzé e coscita noscia comunanza«.

Na bela festa per nesc »veies« da Vich: Per n muie de egn sa Vich la festa per la jent de età la é stata endrezada da Christine Gögele Fontana e l’é semper stat n bel moment de agregazion e de festa de la comunanza. L’an passà no la é stata fata e chest an enveze l’endrez é stat tout sù da Luisa e Paola Trottner de Dur. »Ne saea che fossa stat n pecià lasciar jir a morir chesta festa – ne à dit Luisa – a nesc veies ge sà n muie bel se troar per n par de ore na domenia domesdì, se la contar sù magari dò n muie de temp che no i se vedea più. Coscita aon domanà didament e dut l’é doventà polito. Sa Vich aon la fortuna che aon n muie de volontadives, duc chi che ge aon domanà aiut i ne à dit sobito de scì, da soi no se fasc nia ma ensema pel doventar de bele robe.«
Dita e fata. En domenia ai 24 de november beleche 100 jent sora i 65 egn (en dut tel paìsc de Vich n’é 190) se à troà te ex sala de Consei de Comun per n bon marindel. Luisa e Paola vel ge dir n fort develpai a duc per l didament e per aer podù ge sporjer ence chest an a la jent de età de Vich n bel moment de legreza e de compagnìa.


Lejé i doi articoi de aprofondiment su La Usc nr 48 stampèda ai 6 de dezember!  (DV/MC)