La Usc di Ladins

En domenia ai15 de dezember a Cianacei, dò la messa grana l’é stat l’ocajion per duta la comunanza per ge sporjer l più bel develpai a si studafech, che te chela bela dì i à podù benedir l nef meso.

L Capo di studafech de Cianacei Tommaso Del Favero à volù ge sporjer n gran rengraziament a duc chi che à dat sie contribut acioche i pompieres podessa aer a la leta chest nef furgon: l Comun de Cianacei e la cater Frazions, la Provinzia de Trent, la Coprativa de Cianacei, la SITC, la Sozietà Ciampac e la Cassa Rurala. »L develpai più gran aboncont - l’à seghità Del Favero - l va a duta la families de Cianacei che les à dat n sostegn fantastich. Ence de gra a eles anché sion chiò a festejèr chesta compra. Voi ence ge dir develpai a la secretèra de comun Lara Brunel che se à cruzià de duta la prateghes burocratiches che doura n apalt«.

Fenii i rengraziamenc, amò dant da la benediscion l’é stat n’autra neva de gran emportanza, con la nomina de la neva nona di studafech de Cianacei, ajache acà pec meisc ne à lascià Silvia Margoni, che aea dant chest titol. »A tor sie post sarà Maria Suen - à jontà amò l Capo di studafech dant de ge lascèr l microfon a don Mario - na persona cernuda con cura: Maria era la femena del compagn studafech Gianluigi, rechies, e la sor del pompier Lino, che amò l’aon chiò te nesc cheres«.

Coscita, con la nona vertia e n bon bèst che spetèa te calonia, l capo-ploton don Mario à podù jir inant con la benediscion del meso che darà sie contribut te la batalia anter vita e mort che ogne dì se scombat su noscia strèdes, na batalia che, coi studafech a verejèr da noscia man, la é mingol manco da fèr spaent.



 (Daniele Verra)