La Usc di Ladins

Somea che l sie seren, zacan en pèsc con se enstes ades, Attilio Dantone de Nato de Pacifico da Dèlba. L’é passà béleche 5 egn da chel 25 de oril, canche l teremot tel Nepal l’à devastà e en pèrt descancelà per semper la val del Langtang, olache el l’era dò a fèr n trekking con 3 amisc.

Ai 23 de november del 2019 Attilio l’é peà via amò n’outa per l Nepal, con sia femena e n grop de amisc. Ajache ogneun no pel portèr ite tel Nepal più che na soma stabelida, tel viac i se à spartì fora i scioldi che servìa per paèr duta la speises. Ai 25 de november te n vilaje a zirca 1800 metres de auteza del distret de Okaldunga l’é stat inaudà doi scoles, olache 100 bec ades i pel studièr sorì. Les é dutes a proa de teremot e chela finanzièda da Attilio la é dedichèda a Marco Pojer, Renzo Benedetti e ai 3 compagnadores locai de la spedizion che à perdù la vita tel teremot.

“Ades sente de aer fat mia pèrt, mia familia me disc che no posse più seghitèr a viver per l Nepal ence se n toch de me restarà semper colavìa finché vive, e peisse che n’outa ogne doi egn jiré semper colavìa, olache i eies de la jent é piens de legreza e calor. Aló é abù na seconda vita, ma ades mia vita cogn jir inant chiò, te chesta val olache l’é n muie de jent che me à didà a portèr a compiment chisc lurieres.
L’é soraldut per chest che é volù vegnir chiò da La Usc, perché travers chest sfoi volesse rengrazièr de cher duc chi che me à didà, perché gé da soul no aesse podù fèr nia."

De più su La Usc stampèda de vender ai 10 de jené 2020.  (Lucia Gross )