Doi sores te l’Argentina

Data

19 de jené 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Adele e Marialuisa Pollam da Vich ne conta de la bela esperienzes fates tel Paìsc del Sud America.



De november noi doi sores, con autre amiche, aon fat n viac te Argentina.
L’Argentina l’é na tera n muie grana, per chest aon dezedù dute ensema, eraane 7 femene, de jir demò a Buenos Aires e da lótel Nord e Nort-Ovest. L’é stat na bona idea perché aon podù aprejiar de più desvalives teritories e viver più da vejin co la jent del post.

L’é bela jent, n muie desponibola e algegra: se i ne sentìa rejonar talian, sobito i ne contaa de sie aves vegnui da la Talia acà n muie de egn.

E che posć: un più bel che l’auter! Da le »pampas«,gran praarìe olache sion jite ence coi ciavai, che i gauchos trata desche persone a le »Cascate de Iguazù«tant da la man Argentina che da chela brasiliana, olache chisc maraveousc sauc i à la maor portada de aga del mondo. 

Con na »lancia«sion jite sot ite e se aon fat la più gran docia del mondo! E proprio chela dì Adele à festejà so compilan: na emozion unica!

Aon traversà la »puna argentina« n desert en aut tel cher de le Ande tel nord/ovest de l’Argentina. Chest sompian l va da Salta fin al confin con la Bolivia. Somea de ruar su n auter pianet. Chiò se pascenta lama, vigogne e guanaco.

Aon vijità l parch nazional »Los Cardones«, l secondo del Sud America, olache se auza drec n muion de cactus con tedò le Ande piene de neif. Aon podu goder di monc dai più bie colores, crepe con na stratificazion de minerai, solper, fer, ram e calcio, che a contat con l’aria i se ossida e i ciapa dute le gradazion dal più chiar al più scur. Na marevea unica!

Sion passade ence per la »Salinas grande«,la 5^ più grana del Sud America: la più grana la é te la Bolivia. Somea de esser te n desert de neif, a 3000 metres de auteza, ma al ciaut.

A sud de Buenos Aires aon vijità ence n parch natural de leghes e paluves olache aon podù veder n muion de ucìe desferenc (ló n’é 350 sort) e piens de color, desché l tucan, i colibrì picoi e asvelc e autres animai desché l caiman, i capibara, cerves e scimies. 

E l magnar: la ciarn l’é soa specialità: ogni vacia pel se pascentar en libertà e l’à 1 etar de pascol a desposizion: se pel capir perché la ciarn la é scì bona!

Te picoi paìjes fora dal mondo aon magnà te le familie e l’é stat n’autra bela esperienza fona e vera.

Buenos Aires l’é na gran zità de 4.000.000 de jent, piena de vita, con n muie de vert, strade larie a 12 corsìe, e ogni zona la é desvaliva da l’autra, tant che par de esser ogne outa te n’autra zità.

Chel che ne à colpì de più l’é stat l raion “La Boca”, con si murales vives e le ciase dute de banda dai colores forc.

La via maora, Avenida 9 de Julio, l’à te mez l’obelisch simbol de Buenos Aires. Sot ite va le squadre de balon e duc i sportives a festejar soe vitorie… e gio (Adele) me sentìe proprio de ciasa!

Te ogne strada e te ogne piaza se podea veder balar l tango: na musega che te ciapa e che i argentins i à proprio tel sanch!

L’Argentina, na uta che tu l’as veduda, la resta tel cher, desché la jent e con sie murales la te fasc rifleter sui valores de la vita. 

Te n muie de posćcon mia sor Marialuisa é recorda mie cariscim Dino: te desvalives momenc l se palesaa e l’é stat semper co me! Talpai Cikolo!

E dapò rengrazion l Signoredie e la vita per aer podù far chest bel viac e che dut l’é jit ben.

 ( Marialuisa e Adele Pollam)