La Usc di Ladins

N percors per valorisèr joegn ciantarins e musizisćde nesc paìjes, con lezions de tecnica vocala e strumentala e scontrèdes de musega ensema per ge dèr vita a neva bands de musega da prejentèr via per l’istà del 2020. L’é chest l’obietif del nef projet»Cianton da marevea…d’istà«, nasciù da la joena ciantarines Mery Locatin, Melany Locatin e Sabrina Calligari, dai maestres de musega Samantha Pederiva, Alex Pederiva e Filippo Chiocchetti e dal staff de la Coprativa sozièla INOUT, che ge va dò a chel realisà a la fin del 2019.

Tel nef »Cianton da marevea…d’istà«se vel ge dèr lèrga ai neves talenc musicai del teritorie, en particolèr ciantarins, chitarisć, bassisće baterisćcon esperienza, anter i 17 e i 30 egn, a na vida che i posse se scontrèr e crescer dal pont de veduda de la tecnica e de la prejenza scenica. L’intenzion l’é chela de envièr via n laboratorie creatif olache i joegn posse madurèr esperienzes artistiches che ge consente de se prejentèr tedant al publich con n repertorie de calità, zenza se pesimèr e con la segureza de sia calitèdes e de sia braùra. 

Dut l percors, programà per l’aisciuda del 2020 con scomenz da la fin de firé e resservà a n numer limità de scric ite, sarà de utol per enjignèr i apuntamenc de l’istà che vegn da meter tel calandèr di Comitac manifestazions de la val.

Endèna l cors de formazion chi che tol pèrt arà l met de tor dant n repertorie gran e desvarià de cianties, vèlch una de chestes per ladin o etres lengac de mendranza, de gra a la colaborazion con l’Ofize linguistich del Comun general de Fascia e con la istituzions de referiment, partner del projet.

Per chel che vèrda la pèrt tecnica, te la formazion de »Cianton da marevea… d’istà«l grop vegnarà vidà da n team de ensegnanc duc fascegn, joegn ma con jà n bon bagai de esperienza: Samantha Pederiva per l ciantèr, Alex Pederiva, Filippo Chiocchetti e Tommaso Dondio per la pèrt strumentèla, en particolèr chitara, bas e baterìa. Sarà 10 lezions individuèles con l maester de strument o de ousc e 5 scontrèdes de musega ensema. L cost é de 100 euro.

Per domanes e per aer maor informazions su l’endrez di corsc se pel jir a la sera de prejentazion en domenia ai 2 de firé da les 20.30 te Oratorie de Poza. Per se scriver ite al projet ge vel contatèr i organisadores, scriver na mail a info@inoutfassa.como chiamèr l 349 6491192.