La Usc di Ladins

Te chest meis de jené 2020, enscin en domenia ai 26, la stazion meteo de Pecé a Moena l’à registrà en media na minima de 6,52 degrees de freit e na mascima de 5,3 degrees de ciaut. L’é stat donca amò mingol più ciaut che l’an passà, canche en media te dut l meis l’era stat -7,8° la minima e +4° la mascima.

Chesta temperatures, disc Claudio Gabrielli de Pavarin da Pera, che da egn l’à la pascion de segnèr sù e confrontèr i dac de la stazions meteo, ne dèsc conferma en sostanza del sciudament global. Defat podon se recordèr che ti egn passé aer 15 o 20 degrees de freit fora per l’invern no l’era nia da cert.  

Vardan i dac de la Stazion de Meteo Trentino de Pecé a Moena, loghèda a 1200 metres de auteza, Claudio de Pavarin ne met dant desvalives etres dac e curiositèdes. Semper per chel che vèrda l meis de jené del 2019, se pel veder che l’era stat 17 dis con soreie, 3 dis con neif olache n’era vegnù 27 centimetres, e 9 dis con pievia con 11 milimetres concosté. 

De firé l’era stat mingol più ciaut, con en media -6,3° de minima e 8° de mascima, e te chest meis l’era stat ben 20 dis con soreie, ma te 3 dis l’era vegnù jù 70 cm de neif e te 4 dis 63 mm de pievia.

L fat che la pievia vegne semper più debel e te pec dis l’é stat na carateristica fora per dut l’an: ence a chesta sort de mudament climatich cognon oramai tachèr a se usèr.

Te dut l’an 2019 l’é vegnù jù 1175 mm de èga te 150 dis, e de chisc 130 é vegnui jù te 6 dis, dai 25 ai 30 de messèl, e te etres 5 dis, dai 20 ai 24 de aost, n’é ruà etres 60 milimetres.

I meisc più burc l’é stat mé e november: de november l’é stat ben 20 dis de pievia, con 260 mm, e amò 45 cm. de neif; demò 6 l’é stat te chel meis i dis con soreie. Ence mé l’é stat burt e freit: demò 5 dis con soreie, 125 mm. de pievia e na temperatura mesèna de +2,3° tel moment più freit da doman e demò de 13,3° tel moment più ciaut del dì.

Alincontra de mèrz l’é stat l meis più bel, con 22 dis de soreie, e dapò 20 dis de bon temp é stac registré, desche de firé, ence de jugn e de setember. De jugn l’é stat l maor ciaut, mediamenter 25 degrees de mascima, vegn dò messèl con 24,4°, aost con 24° e setember con 19.

De dezember l’é stat l meis con manco dis de soreie, demò 3 en dut: te chest meis te val l’é vegnù jù 43 milimetres de èga e 20 centimetres de neif, ma n muie de più l’é stat la neif vegnuda a l’auta: sun Marmolèda, sun Sas de Mul ai 15 de dezember n’é stat mesurà 325 centimetres, che ampò a la fin del meis la era jà jita jù a cm. 170.

Rengrazion Claudio de Pavarin per ne aer sport chisc dac.  (lg)