La Usc di Ladins

En domenia ai 2 de firé n gran gran cher à lascià de bater: chel del dotor Carlo Spagnolli. 

L’aea demò 70 egn, ma na vita olache no l se à mai sparagnà per didèr i etres aea fià sia sanità e ti ultimes egn l’aea cognù vegnir de retorn da sia amèda Africa per se rencurèr tel Trentin, olache l’era nasciù.

Ence duta Fascia pianc la mort de chest gran om, che l’era n muie cognosciù e amà te noscia val e soraldut a Poza.

N leam fort, che era nasciù acà passa 40 egn da l’amicizia anter Carlo Spagnolli e Claudio Merighi con la Crousc Checena de Fascia, e che tel temp l’é cresciù te la sociazion Lifeline Dolomites. L’an passà, per la pruma outa, Carlo Spagnolli aea cognù renunzièr a vegnir te noscia val per la Festa de l’amicizia e de la solidarietà, che da 20 egn Lifeline Dolomites à endrezà ogne an de aost te Val de Sèn Nicolò con duc i amisc e i volontadives de la desvaliva sociazions che te dut l Trentin e la Tèlia sostegn i projec che Carlo à envià via te l’Africa. Na giornèda che ti egn à fat strenjer l leam anter Spagnolli e la comunanza de Poza, tant che ai 21 de dezember del 2008 l’aministrazion del Comun, vidà enlouta da la ombolta Alessandra Cloch, ge aea sport la zitadinanza onorèra.
La sepoltura de Carlo Spagnolli sarà en jebia ai 6 de firé da les 4 domesdì te la gejia parochiala de Sènta Maria a Rorei. 

De più su La Usc stampèda de vender ai 7 de firé.  (Lucia Gross )