La Musega da Vich festejea 200 egn de atività. Per chest cedean de gran valuta la formazion à en program na lingia de scomenzadive, tacade en domenia passada, la dì de Sènt’Uiana, con l’inaudazion de la mostra che conta la storia del grop.
Dò la messa sun Ciaslir, duc se à troà tedant Ciasa Marmolada, olache te la sala mostre l’é stat alestì l’esposizion. Aló da fora, olache l’era stat endrezà ence mingol de aperitif, l’é stat l moment ofizial, a la prejenza de autorità e raprejentanc de desvalive sociazion volontadive, portà dant da Alex Rasom che à rejonà de ocajion dalbon speziala, de na storia de musega ma ence de empegn e soraldut de servije a la comunanza.
Del segnificat de chest prum apuntament l’à rejonà l president de la Musega da Vich Donato Calligari che à uzà fora l’orgolie de poder festejar chest cedean, recordan chi che l’é stat dant. A rencurar la mostra l’é stat Fabio Zanoni e Lorenza Rossi con n grop de museganc, che se à cruzià de cerir i retrac, n’é stat cernù 60 da meter fora anter i presciapech 2000 touc sù, ma ence strumenc e partidure veie, dapodò l’é stat metù a la leta na postazion per scutar musega e una olà poder veder śirar na selezion de le sacotante foto che no à troà post te l’esposizion. Per chesta ocajion l’é stat ence realisà n liber storich, che se pel troar a la mostra che per endana la averc amò n’outa ai 25 de firé, martesc gras, da les 14:00 a les 17:00 e dò la sarà a la leta via per dut istà, dal prum de messal enscin ai 8 de setember.
De più su La Usc stampèda de vender ai 21 de firé 2020. (Cri.m)
Na storia longia 200 egn
Data
24 de fauré 2020
Grandeza scritura
Social
La Musega da Vich festejea doi secoi de atività con na lingia de scomenzadives: pruma tapa l’é stat l’inaudazion de la mostra che conta passà, prejent e davegnir de la formazion.
