Coronavirus: anulà l bal en mèscra a Poza

Data

23 de fauré 2020

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
I hotelieres vegn envié a segnalèr se i à ghesć che rua da Lombardia e Venet.
L president de la Provinzia de Trent Maurizio Fugatti ensema a vèlch assessor de la Jonta e i dirijenc de la task force metuda sù per monitorèr la situazion de emergenza coronavirus se à troà en domenia domesdì ai 23 de firé per fèr l pont de la situazion. L’é stat dezidù de serèr l’università per duta la setemèna che vegn e en lunesc vegnarà dezidù se serèr ence la scoles e scolines fin al prum de mèrz.

Endèna anché l president Fugatti à manà fora na letra a duc i operatores turistics e a le Apt de la Provinzia per ge domanèr che “per precauzion i ge fae a saer al nr 112 se te sia strutura i à ghesćche rua da la arees geografiches che é states metudes en carantena ti Comuns jà segnalé te la Lombardia e tel Venet. A chesta vida l Departiment de la Prevenzion de l’Azienda Sanitèra provinzièla podarà endrezèr chela azions de sanità publica che é states dezidudes tras na ordenanza provinzièla e che l’é de besegn percheche l virus no se slèrie fora.”

Anché l Comitat manifestazions de Poza à fat a saer che aldò de l’ordenanza provinzièla nr A001/2020/122695/1 che perveit che vegne descancelà duc i evenc che vegn endrezé daìte per via de possiboi empestamenc de Coronavirus, ence l Bal en mèscra de en mèrtesc ai 25 de firé te tendon de la manifestazions de Poza é stat anulà. Vegnarà fat enveze la gran defilèda fora per paìsc de Vich con scomenz da les 14.30.  (mci)