La Usc di Ladins

En lunesc ai 24 de firé l president de la Provinzia de Trent Fugatti à manà fora na ordenanza per anulèr duta la manifestazions pervedudes a l’averta o daìte leèdes diretamenter o indiretamenter ai festejamenc del Carnascèr per via de possiboi empestamenc da Coronavirus. Donca anché, mèrtesc gras, nia festes de Carnascèr te nesciun paìsc de Fascia.

A Ciampedel i se l’à schivèda e i se à atrezà jà en domenia domesdì con la dejenfezion. I é passé fora per paìsc con couribocia, couriciuzé, maneces e tutes antivirus e per esser segures de se parèr dalbon dal virus i se à tout dò ence la bira Corona. 

Per prum a passèr fora per paìsc l’é sat l Laché, compagnà dai Marascons e dal Bufon. No podea mencèr la prejenza del Paiazo e del Bezuch, mèscres tradizionèles de Ciampedel. Se à vedù passèr i Polins de Fascia, i cromeres, i conscric, la boteiga de la penchies, l dotor dai denz, l zacaplastica, chi che lejea la man e fajea pronostics, chi che volea sgolèr taché ti balons e n muie de etres. E se sà ben chi de la dejenfezion… L’é stat n bel moment de festa per gregn e per pìcoi. Publicon vèlch retrat del Carnascèr de Ciampedel e ve auguron coscita bon mèrtesc gras!   (mci)