Don Pio, pussà te la pèsc del Segnoredio

Data

28 de fauré 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
En vender ai 28 de firé l’é mort a Pera de 88 egn don Pio Casari de Ciurc.
L'era nasciù a Pera del 1931, Pio Casari, e amò joenet l’aea scomenzà a se endrezèr ensema con Silvio Bernard per l’ejam de amiscion al Seminarie. Del ’43, canche l’aea 12 egn, l’era jit ja Pardac, olache l’era na sezion del Seminarie per Fascia e Fiem, ajache la senta de Trent era stata bombardada.

Dò doi egn a Pardac l’era jit inant coi studies a Trent: l’era i egn sobito dò la vera, e anter fam e freit no l’era na vita sorida. Don Pio e don Silvio i era stac ordené preves ensema ai 17 de mèrz del 1956 e l prum de oril i aea ofizià sia pruma messa te Fascia: na longia procescion aea compagnà i doi preves via per stradon da Pera enscin via Sèn Jan.

Ti egn dò don Pio l’é stat a Caldonazzo, Folgaria, Mattarello, Nosellari e Carbonare, e del 1986 l’é stat manà apede ciasa, a rejer la parochia de Poza. Chiò l’à fat ence operes emportantes, l’à fat sù l’oratorie nef apede gejia, l’à fat i prumes lurieres per ge dèr luster a la gejia de Sèn Nicolò, fajan da nef dut l cuert e ence l salejà e l mur entornvìa.

Del 2006, per l’età e l’entravegnir de problemes de sanità, l peis maor de rejer la parochia de Poza, ensema con chela de Pera, era stat tout sù da don Giuseppe Da Prà, ma don Pio l’à seghità amò per n muie de egn a didèr e sporjer sie servije.

Del 2016 de mèrz la comunanza de Poza e Pera ge aea fat gran festa per si 60 egn da preve e 30 te Poza. Don Pio aea conzelebrà la messa con don Andrea Malfatti e a la fin l’ombolt Giulio Florian ge aea dit l devalpai de cher per l servije sport per Poza e Norbert Bernard ge aea portà dant la recognoscenza de la comunanza de Pera, seran sù con la paroles che duc anché ge renovon: “Che l Segnoredie Ve dae cent oute chel che ne aede dat Vo.”

L’obito é en sabeda ai 29 ed firé da les 14.30 te gejia de Pera.

 (Lucia Gross)