La Usc di Ladins

Les é jites en doura en mèrtesc da doman, ai 10 de mèrz, ence tel Trentin la mesures del nef decret sotescrit en lunesc sera e sobito publicà su la Gazzetta Ufficiale. Intervents per schivèr che se slèrie fora amò de più l Coronavirus, chi che la setemèna passèda era stac emponui a la Lombardia e a autra 14 provinzies del nord de la Tèlia. En mèrtesc da doman la Tèlia se à descedà coscita con la neva che dut l Paìsc é doventà »zona rossa« e che duc da chiò inant cogn respetèr la neva regoles de comportament. N intervent legislatif che l’é stat de besegn, l’à spiegà en lunesc sera l premier Conte, vedù coche à tacà a se slarièr fora debel l virus e l smaorament de caji de malé sul teritorie nazionèl. 

I dac muda dì per dì, anzi ora dò ora, i se smaora debel ence tel Trentin tant che l’ospedèl de Reveredo l’é stat adatà per i caji de terapia intensiva.

L nef decret à inom »Gé stae a cèsa« e l perveit dant da dut l diviet sun dut l teritorie nazionèl de binèr motes de jent te lesc publics e averc al publich.

Ge vel limitèr i spostamenc da cèsa che i sarà possiboi demò per trei rejons: lurier, besegn o sanità. L minister de l’Interno Lamorgese à spiegà che se podarà se spostèr fora dal comun de residenza demò per besegnes de lurier o per situazions leèdes a la sanità, ma se cognarà se desćiarièr da internet o domanèr ai Polins o Carabinieres n formulèr da compilèr ite per spezifichèr la rejons del spostament e l tegnir semper te auto.

L nef decret perveit ence che duc i bar, restoranc e pizerìes posse restèr averc da les 6 da doman a les 6 da sera se vegn respetà l’obligh de arsegurèr la distanza de segureza. Da les 18.00 cogn serèr ence discoteches e lesc de devertiment. 

Fin ai 3 de oril la scoles e la universitèdes restarà serèdes. Per chel che vèrda l mond del sport vegn lascià sù i evenc e la competizions sportives de ogne orden e disciplina, te lesc publics o privac.

La neva desposizions del Goern à emponù ence de serèr i impianc portamont jà con mèrtesc ai 10.

De più su La Usc stampèda de vender ai 13 de mèrz 2020.



 (Monica Cigolla)