La Usc di Ladins

En vender ai 6 de mèrz te la sala esposizions del Liceo Artistich de Poza l’é stat avert na mostra olache l’é stat metù fora la idees di studenc de la classes quintes del Design e de l’Èrts Feguratives sui lurieres de comedament de la rodadoa de Sèn Jan, vejin al destributor de penzin Q8.

La scomenzadiva é nasciuda su encèria de QC Terme Dolomiti: ogne student à realisà na instalazion tolan ispirazion da elemenc de la natura che fèsc referiment a la termes, donca èga, goces, vamp, neif, giacia, crep. En dut l’é stat lurà fora na vintina de projec per l Feguratif e 17 per l Design.

La sorastanta de la Scola Mirella Florian à dit che se aessa volù meter a jir na inaudazion con più jent, ma conscidrà l’emergenza sanitèra che sion dò che vivon, che à ence emponù de serèr la scola, l’é stat envià demò vèlch ensegnant, vèlch un di studenc e se sà ben l diretor Matteo Agnolin en raprejentanza de la comitenza. Florian à rengrazià duc chi che à lurà per chest projet, palesan sodesfazion canche se pel fèr vèlch per l teritorie. N rengraziament l’é jit ence al Comun de Sèn Jan per aer ativà l’enconter jà con l diretor de QC Terme da dant, Alessandro Di Bartolo ensema con i complimenc al medemo Comun per aer metù en esser la rodadoa che à permetù de tor demez l crouscdevia, dalbon n muie pericolous.

 (Cristina Marchetti)