La Usc di Ladins

Mario Desilvestro, soa femena Roberta e l fi Simone l’é trei volontadives de la Crousc Checena de Fascia.

Trei persone te la medema familia che te chest temp senester no se tira endò a portar didament e socors olache i vegn chiamé. Roberta l’é ence na OSS, la fasc la assistenza a ciasa a le persone che no pel per sé col Comun general de Fascia.

L coronavirus à metù a dura proa ence i volontadives de la Crousc Checena, ogne outa che i vegn chiamé l’é semper l dubie. Ma no i se lascia venjer da la tema, ic sà de esser enjigné ence per chesta sort de intervenc.

Aon tanche fat n cors te senta de la Crousc Checena de Moena su coche se fasc a se regolar e deregolar con i camejes protetives aldò - ne à dit Roberta - e dapò fajon semper corsc de ajornament, ence su la netijia, se tu sas che che tu cogne far te fasc manco tema.

Siede stac chiamé per coronavirus enscin ades? Na - respon Roberta - ma aboncont fossane enjigné. Acà 10 dis jiane fora desche zenza, ben con le manice, chele le aon semper metude, ades enveze cognon semper se meter ence l couribocia, a noi e ai pazienc.

L’é stat enjignà na ambulanza aposta con ite demò n letin - ne à spiegà l nef president de la Crousc Checena Francesco Sommavilla - demò chel che basta per far l trasport percheche dò l meso cogn vegnir svoidà e dut chel che l’é int cogn vegnir sanificà fora Ciavaleis e se ge met mingol de temp. Aboncont l’é jà la zentrala che ne disc che sort de intervent che cognon far percheche canche chiama valgugn i cer de capir subit de che che se trata. Se fossa n sospet de coronavirus dant de pontar demez cognassane se meter l camesc protetif aldò.

Co vivede chesta situazion te Crousc Checena? Se sdramatisea belebon - disc amò Roberta - percheche se dalbon se pissassa a chel che se va encontra no jissa più fora nesciugn. Noi se sention enjigné, stajon ascorc e se didon fora l’un co l’auter.

Mie om Mario à dat ence la desponibilità per l servije che à inom “Il tempo della gentilezza”, vegn consegnà le medejine a ciasa a chi che no pel jir fora. Basta chiamar la speziarìa che dapò la chiama la Crousc Checena. Ence te chisc caji ge vel jir con manice e couribocia.

Te familia siede cruzié? Se ge peissa - disc Roberta - e no se va a cher lijier, ma chel de far zeche per la comunità ne spenc tant.

L president Sommavilla disc che la paura la é semper ajache la pruma roba che se peissa ades canche i chiama l’é l coronavirus. I volontadives é a la leta 24 ore sun 24, i é de passa 200 e na otantina chi che fasc servije con l’ambulanza.

A duc i volontadives de la Crousc Checena e de la Crousc Biencia ge sporjon nosc gran develpai con n gran braciacol virtual.

 (Monica Cigolla)