Lurier e scola, no l’é nia sorì

Data

23 de merz 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L’esperienza e valch conscidrazion de na mare che laora da ciasa.


Te chesta situazion dalbon da no creer noscia vita da duc i dis la é stata rebaltada sotessora per via del coronavirus. Te na atmosfera ireala da strassomech, degna di miores film de fantascienza, ogne familia é dò che la se sproa a se dar n nef endrez e canche l’é bec l’é amò più senester.

Chi che laora defat cogn vardar de cordar so empegn con l’atività didatica che la scola é stata bona de meter en esser da dalonc e, no da ultim, ence con la tema che, pech o trop, la ciapa ite ence i più picoi.

Gio laore per la redazion fasciana de La Usc e son mare de n bez de 10 egn. Te ofize aon dezidù de proar a lurar da ciasa per aer manco interazion possibola anter de noi. A ciasa ampò no l’é sorì ence percheche ben segur sion duc daìte, l’é belebon revedoz e gio stente a me concentrar.

N’autra dificoltà l’é ge star dò a mi fi con le lezion on line: soe ensegnante le é dò che le porta inant dalbon n gran lurier ma el da soul no l se rangia e cogne seghitar a passar da mie computer a chel so, l temp somea passar più debel che zenza e rue a la fin de la giornada col ciaf pien de informazion e de input neves e desvalives dal solit.

Dapodò l’é l’aspet sozial che ne tocia duc ma che, amancol per mia esperienza, tol ite soraldut i bec. L fat de no poder veder i compagnes de scola, jir a se far doi pasc o prategar valch atività sportiva prest podessa se mudar te na sort de deprescion, donca me sproe a meter a jir con el valch atività de jech, l tole ite canche enjigne da magnar, magari valch de particolar che no aon mai fat, o fajon ensema valch ejercizie per se tegnir en forma, corp e ciaf.

Vardon de se rejonar n muie te ciasa, de ge domanar chel che l peissa e coche l se sent e l spenjon a palesar so pensieres.

Dut chest, ben segur, speran de no se malar e zenza pissar massa, te chest moment, a chel che dò, canche sarà passà dut chest, cognaron tor dant per forza, na situazion economica che fasc gran tema, tant a livel local che a livel nazional, mai veduda inant.

Ampò l’emportant te chest moment l’é star unii, ben segur no materialmenter ma col pensier, far le robe con ferstont e aldò de le regole e se sforzar de esser positives. Jirà dut ben.   (cri.m)