La Usc di Ladins

La persones positives che cogn stèr en carantena cogn stèr ascortes a no ge passèr l virus ai etres. Apede ai conseies e la racomanazions manèdes fora da l’APSS, desche se lavèr de spes la mans, durèr couribocia e maneces, no se tocèr eies e bocia e dejenfetèr de spes la robes che se tocia, l’é regoles ence per la regoeta e desgorta di refudames de cèsa, ajache ence chisc pel slarièr fora l virus.

Prum de dut la persones positives no cogn più desferenzièr l refudam ma les pel trèr dut ensema te n bidon con cuerchie e pedal. I refudames cogn vegnir metui te doi o trei sachec, un te l’auter e chiò se pel trèr ite dut cant ensema: plastica, vierech, papier, vanzumes de cojina, metèl e dut chel che resta. Ence i fazolec o i rodoi de papier, i couribocia, la maneces e i camejesc cogn vegnir peté tel medemo bidon. Con la maneces ge vel serèr ben i sachec zenza schicèr jù con la mans e canche i é seré se cogn petèr demez la maneces te n sachet nef. Sobito dò se cogn se lavèr la mans. I sachec di refudames cogn vegnir trac demez ogne dì o amancol i cogn vegnir tegnui te n post olache no pel apede nesciugn, nience i giac o i cians de cèsa.

Se enveze no se é positives e no se cogn stèr en carantena se pel seghitèr a fèr la regoeta desferenzièda. I fazolec de papier, i couribocia e la maneces va metui tel sachet de chel che resta, miec durèr doi o trei sachec un te l’auter. Ge vel serèr ben e petèr demez, desche zenza.

I Comuns de Fascia à endrezà l servije de regoeta di refudames per la persones en carantena. Ge vel meter i sachec te un più gran, de chi neigres, empienì a na vida che chi che va a l tor i posse l ciapèr ite demò con na man. I sac gregn cognarà vegnir metui te n post sorì da poder apede, la sera inant che i passe a i tor sù. L servije vegn fat de lunesc per i Comuns de Cianacei, Ciampedel e Mazin e de jebia per i Comuns de Sèn Jan, Soraga e Moena. Ge vel se prenotèr e telefonèr te Comun o manèr na mail.

 (mci)