40 egn de bai e sćiavatèdes con i Schuhplattler de Ciampedel

Data

23 de mei 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Ai 5 de mé del 1980, da la Sègra di Senc Felip e Giacum, l grop di Schuhplattler de Ciampedel i aea fat sia pruma esibizion. Dò carant’egn chest grop amò endeletea la jent con sia alegrìa.



»Ai 5 de mé de chest an, assane fat carant’egn de atività - l ne disc l joen president Samuel Lazzer. Te piaz de Ciampedel, tedant al pech, se aane jà endrezà per fèr sù l tendon. Apontin da november de l’an passà, se troaane vèlch outa al meis per organisèr la festa. Desche dis, aane cernù i 9 e 10 de mé, ajache la setemèna dant fossa stat la litazions aministratives. Volaane fèr ence la procescion da Piaz Veie e la defilèda de domesdì«.

Da Salorn, Apian e Termen l’era jà ruà la conferma de la partezipazion di gropes de Schuhplattler. Aessa cognù tor pèrt ence la Mùsega Auta Fascia, l grop di »Aizenponeri« de Pardac, l Grop folk de Cianacei e l Grop de folclor de Marmolèda, da Rocia. Fossa stat dassen na gran ocajion per la jent de Ciampedel per stèr ensema e festejèr l travert arjont dal grop.

»Anter chel che volaane fèr, l’era ence prejentèr n bal nef e fèr n video sun Ponta Grohmann. Nesciuna persona se aessa mai pissà che podesse vegnir fora dut chest. Aboncont, noscia idea resta bensegur chela de jir inant. Speron de poder la fèr chest uton, se no la vegnarà sburlèda a l’an che vegn« ne disc con speranza Samuel.

N viac te la storia

I prumes retrac de n grop de Schuhplattler a Ciampedel i é daté n muie dant che l 1980…
Samuel Lazzer: Ei, n’aon troà fora desvalives e i prumes i é daté 1952. Se conta che, dò la vera via, sie vegnù cà da Fié del Sciliar n cert Franz. Zachei se recorda che el l lurèa desche pèster su per Duron. Sessaben, su per aló lurèa ence vèlch joen de Ciampedel desche boschier e, anter na grignèda e l’autra, i é doventé amisc. Dò vea i se troèa fora per chesta ostarìes e chest Franz, che l saea balèr Schuhplattler, l ge à ensegnà a chisc joegn. Dò che chest Franz l’é se n jit, l grop l’é jit inant per dotrei egn e dapò i à lascia ló. Su un di retrac che aon ciapà fora l’é su Osvaldo Ninz, Nini Rizzi, Giuseppe Rasom, Ermano Riz, Valter Battel, Riccardo Rizzi, Giuseppe Paolinetti, Cipriano Bernard, Celeste Depaul e Ezio Depaul. Anter la touses, l’é ite Olinda Riz, Carmen Rizzi, Elsa Lorenz, Frida Bernard, Ester de l’»Agnello« e na svizra. Chisc l’é chi che sion stac bogn de troèr fora.

De più su La Usc stampèda de vender ai 22 de mé 2020.

 (Nicoletta Riz)