Chel de loghèr jù i auti l’é n problem che a na vida più o manco pesoca tocia duc nesc paìjes olache, estra che con i auti di residenc, ge vel fèr i conc ence con chi di ghesć che rua per sia vacanzes. Per chest la aministrazions é semper a la enrescida de terens e spazies da poder desfrutèr con chesta destinazion e via per de oril l Consei de comun à aproà na cordanza anter publich e privac per poder recuperèr mingol de spazie per chest zil.
L’ombolt Giulio Florian à spiegà che l Comun de Sèn Jan l’à n toch de teren publich de sia proprietà sot l’Hotel Dolasilla. Per schivèr l risech che dintornvia sia strutura aessa podù vegnir fat sù valch, per ejempie n piaz dai auti, l patron Renato Constantini ge à palesà al comun la volontà de se meter d’acort anter publich e privat per far n lurier ensema.
»La cordanza arjonta perveit che l patron del Dolasilla l realisee n piaz per i auti sot tera, ge dajan l met al comun de meter ite n cert numer de auti, aldò de na biota valutazion economica da man del Servije Patrimonie, lascian che de sora reste pra – l’à deschiarì l’ombolt. Alóapede l’é ence na picola ciasa de proprietà de n auter sentadin che la vegn batuda jù e fata sù da nef sunsora chest piaz dai auti ma n muie più en via. L’idea l’é de ge dar a chela zona de Vich l met de lasciar jù i auti e dapodò ence de ruar tel zenter percheche vegn fat n percors pedonal che dal piaz l rua tedant l’Hotel Corona, n intervent che anter l’auter califichea l paisc.«
De più su La Usc stampèda de vender ai 22 de mé 2020. (Cristina Marchetti)
N nef piaz dai auti per Vich
De gra a na cordanza anter publich e privac te la frazion de Sèn Jan vegn dat na pruma resposta al besegn de spazies per loghèr jù i auti. L’é tacà i lurieres de comedament per l troi che va a Pera.
Galaria retrac
View the embedded image gallery online at:
https://www.lausc.it/valedes-ladines/fascia/12732-n-nef-piaz-dai-auti-per-vich#sigProId7eb1c31cdb
https://www.lausc.it/valedes-ladines/fascia/12732-n-nef-piaz-dai-auti-per-vich#sigProId7eb1c31cdb