La Usc di Ladins

N’autra categorìa che é stata penalisèda debel dal coronavirus l’é stat chela di trasporc privac. Fosc chesta più che dutes ajache col meis de mèrz passà, da canche l’é stat declarà l lockdown, no l’é più stat nesciugn che se à moet e che à abù de besegn de mesi de trasport. Ades che la situazion somea se envièr via envers la normalità, chest setor resta chel con più malsegurezes. 

Nos aon sentù Cesare Desilvestro da Moena che, ensema a sia familia, l’é patron de la firma Taxi e Viaggi de Franco Desilvestro, una de la firmes maores de trasport privat.

"Cesare, te chest moment siede amò cec col lurier? - Ei l’é dai 10 de marz che sion cec coi mesi te garasc e no saon canche se poderà endò tacar a laorar. Dant no se podeva se möver nia deldut, dapò se no podeva jir fora da la provinzia e da la region e donca nesciugn se à più fat inavant. Ades i é amò duc mingol prudenc, nesciugn prenota".

"Aede ciapà vèlch indicazion de co poder lurèr? - Zacan chisc dis l’é ruà valch linea guida per i trasporc de persone ma cogne dir che enscin ades sion proprio stac taiè fora e desmentiè, tant che stroz per duta la Talia l’é stat manifestazion de protesta. Se saeva che sui aerei i passejeres pol montar sù duc vejign, l’emportant l’é che i se dejenfete le man e che i tegne sù i couribocia, i dijeva che ence noscia categorìa voleva spenjer e far valif che i aerei, perché po lori scì e noi no? Adertura se sentiva dir al scomenz che sun na coriera da 50 posć podeva montar sù demò da 12 fin a 18 persone e no de più".

Lejé duta l'intervista su la Usc nr 21 stampèda ai 29 de mé  (Monica Cigolla)