La Usc di Ladins

La sajon é beleche vertia a pontèr via, con duta la dificoltà e la malsegureza che la pel se tor dò da man di gestores de la strutures de acolienza turistica. Duc rejona de vieresc e barieres per tegnir dalonc la persones, de couribocia e maneces per se parèr dal virus, de gel e saons per tegnir dut net, de percorsc e limitazions che no cree gropes de persones. Duc, donca, rejona de protocoi. 

Enstadì l'é stat dat fora ence l protocol per i hotìe, con la linies vida per gestir na strutura rezetiva ai tempes del Covid-19. N protocol che, sessaben, l'à didà a entener co se mever ti hotìe e co se enjignèr per la neva sajon ma che, da l'autra man, l'à uzà fora neves dubies e domanes.

Ence per chest la sezion ASAT Auta Fascia, col president Filippo Debertol e coi raprejentanc del consei diretif de sezion, l'à endrezà l webinar “Ripartenza dopo il lockdown vol.2”, scontrèda che é vegnuda apontin dò una pruma che se aea dejout rejonan de temes economics e finanzières. Doi scontrèdes dassen utoles e preziouses, e chiò ge va n develpai a Debertol per la bela possibilità che l ge à dat a duc i sozi de la Val de Sora, che ge à dat l met ai albergatores de aer informazions e poder domanèr consees diretamenter a esperc.

A tor pèrt al webinar desche relatores l'é stat defat te chesta seconda ocajion l president ASAT Gianni Battaiola, l dotor Antonio Ferro del departiment de prevenzion de l'Apss dessema a la dotora Giuseppina Pezzarossi, l'enjegner Stefano Hueller espert formator ASAT e Stefano Zilio consulent de Formazione Alberghiera.

Dedant a beleche 70 hotelieres che à tout pèrt, se à rejonà de la situazion sanitèra tel Trentin e di possiboi scenaries del davegnir; del protocol di alberghes de la Provinzia de Trent; de la responsabilitèdes de l'albergator.

L president Filippo Debertol à rejonà di problemes che se met dant per poder endò peèr via, de na neva endesfida per i hotelieres. L'à volù ence recordèr l'empegn de l'ASAT su la costion leèda al Covid, con la sociazion che l’é stat n pont de referiment te dut l Trentin per si sozi, ma ence per i no-sozi, con na gran supervijion de l'iter che à portà a l'aproazion del protocol. L'à sotrissà che l'é de gran emportanza aer ben chièr coluna che l'é la responsabilitèdes di patrons de la strutures, per esser segures de respetèr la regoles e per les fèr respetèr. »Te chisc doi meisc – l’à dit – aon fat n lurier dassen emportant de gra a video-conferenzes, se aon troà sacotanta outes e ge aon stat dò a la creazion del protocol pas dò pas, per meter a post de outa en outa chel che no jìa. Per chest voi rengrazièr nosc consei di albergatores e l'ASAT per dut l temp e la energìes che i à dedicà a chesta costion«. Lurier dassen aprijià e che à ence portà al protocol oget del webinar, metù a jir debant per i sozi.


L'aprofondiment su la Usc nr 22 stampèda ai 5 de jugn  (Daniele Verra)