La Usc di Ladins

La é nasciuda con chela de didèr fora i boteghieres te n moment senester e per envièr i sentadins de Fascia a jir a proveder te la boteighes de la val. La scomenzadiva »Proveder te Fascia – Gé compre te mia val«, endrezèda dal Comun general de Fascia con sie conseier de procura a l’economìa e al comerz Matteo Iori, à abù dassen n bon suzess tant che l’é stat dezidù de la propor endondanef. 

Dò l bon éjit de la pruma giornèda dai 30 de mé l grop de lurier Boteighes de Fascia à pissà de endrezèr ence na seconda dì per jir a proveder che sarà en sabeda ai 20 de jugn. La boteighes metarà a la leta n coupon del valor del 20% de chel che l’é stat comprà ite da poder spener te n’autra ocajion. 

A la pruma scomenzadiva aea tout pèrt 12 boteighes de Cianacei, 13 boteighes de Sèn Jan e 10 de Moena. A chesta seconda giornèda, apede a chestes, à aderì ence autra boteighes de Fascia tel segn de na maor colaborazion.

»Sion dassen spervaji che chesta scomenzadives cogne vegnir proponetes a dò a dò – à dit l conseier de procura Iori – percheche la jent se use a jir a proveder te la boteighes de la val. ’Gé compre te mia val’ é stata touta sù con partezipazion tant da man di boteghieres che da man de la jent che à aprijià l fat de poder dèr na man al setor del comerz del post. Chesta proponeta à portà ence a neva idees che vegnarà endrezèdes via per l’uton«.  (MCI)