La Usc di Ladins

L’é stat doi scomenzadives dalbon de ecezion cheles che à vedù protagonistes en sabeda ai 13 de jugn doi Museghes de Fascia: la Musega Auta Fascia e la Musega de Poza.

Doi apuntamenc uniches che, travers l lengaz universal de la musega, é stac i ambasciatores te dut l mond sui canai social Facebook e Youtube de messajes auc e noboi: la repartenza, la recognoscenza, l’amicizia e la speranza.

La Musega Auta Fascia à sonà en sabeda da doman a 2.950 metres del Pordoi, su un di barcogn più bie de la Dolomites amò corì de neif, n conzert pissà e volù con gran forza dai museganc enstesc per pontèr via endodanef dò l lockdown de chisc meisc passé a cauja del coronavirus e per ge sporjer n fort develpai a dotores, infermieres e assistenc sanitères che se à dat jù zenza fin te chesta situazion senestra. N moment dassen fon e sentù soraldut canche la Musega à sonà l’In Ladin e l’Ave Maria. L conseier provinzièl ladin Luca Guglielmi, en recordanza de duc chi che ne à lascià, à volù pojèr n maz de fiores jai piesc de la crousc de Sas Pordoi. En sabeda l’era l prum dì che à avert endodanef la forenadoa de Sas Pordoi e con chest apuntament la Musega à volù ence dèr n segnèl de speranza per la neva sajon da d’istà. Prejenc ence raprejentanc de l’aministrazion de Comun de Cianacei, de la SITC e de l’Apt de Fascia.

Tel segn de la repartenza l’é stat ence l video “Il nuovo inizio” de la Musega de Poza, n omaje musical a Fascia e la Sardegna, n post da mont e un da mèr, leé dal fil de la notes de la Banda e del cognosciù musizist Paolo Fresu. Na amicizia che é nasciuda del 2018 en ocajion del conzert che la Musega de Poza à tegnù sun Vael ensema a Fresu per i Sons de la Dolomites. N leam strent che se à renovà amò n’outa te chest nef video e tel toch musical “No potho reposare” (scrit del 1920 da Giuseppe Rachel sul test de la poejìa “A Diosa” de Salvatore Nisi) che i museganc porta dant te val de Sèn Nicolò e l jazzist Fresu dinolongia l mèr de Berchidda. N video rich de emozion che auza fora e ge dèsc amò maor segnificat a dut chel che ne é stat tout ti meisc de pandemìa: l spazie, l contat con la natura, la musega, la sozialità. L’é belapontin chisc valores che l maester de la Musega de Poza Giancarlo Dorich à volù che vegne regoet te chest projet. L video moscia i bandisćte val de Sèn Nicolò (i toc soné é stac touc sù un per un te sala proes), Paolo Fresu con sia tromba en Sardegna e imagines di apuntamenc musicai più emportanc de la Banda desche l’impresa su la Torns del Vaiolet e l conzert coi Sons de la Dolomites, dut su la notes del toch sardo armonisà dal compositor da Roveredo Marco Somadossi. L video, metù ensema dal Karibu Mastering Studio de Torin, é stat realisà da Elisa Salvi e Andrea Selva per l’Apt de Fascia e manà fora en domenia ai 14 de jugn sui canai social.

De più su La Usc stampèda de en vender ai 19 de jugn del 2020. 


 (Monica Cigolla)